Sekretaria Estadu Formasaun Profesionál no Empregu (SEPFOPE) halo konferénsia imprensa hodi ko’alia kona-ba traballadór timoroan sira ne’ebé atu ba servisu iha Austrália no Korea. Imajen Tatoli/ Egas Cristovão

DILI, 20 marsu 2020 (TATOLI) – Relasiona ho pandemia COVID-19 ne’ebé espalla iha nasaun barak, Governu liuhosi Sekretaria Estadu Formasaun Profesionál no Empregu (SEPFOPE) deside suspende provizóriu haruka traballadór ba Austrália no Korea.

Tuir Sekretáriu Estadu Formasaun Profesionál no Empregu, Julião da Silva, bainhira situasaun ne’e normál maka sei reativa fali haruka traballadór timoroan ba nasaun rua-ne’e.

“Ami mós aviza ba kandidatu traballadór hotu,  ne’ebé atu ba Austrália no Korea katak provizoriamente ita sei suspende lai atividade ba nasaun-rua ne’e  tanba relasiona Coronavírus ne’ebe maka agora daudaun espalla iha mundu tomak”, informa Sekretáriu Estadu Julião da Silva, liuhosi Konferénsia Imprensa ne’ebé realiza iha Salaun SEPFOPE, Caicoli, sesta ne’e.

Tuir governante ne’e, Munistériu Negósiu Estranjeiru no Kooperasaun (MNEK) servisu hamutuk ho Governu Austrália no Korea, hodi kontinua koordena no koopera provizoriamente atu suspende atividade traballadór timoroan sira ba rai-li’ur.

Nune’e, Sekretáriu Estadu Julião da Silva apela ba kandidatu traballadór Austrália no Korea sira hodi kontinua mantein kalma.

“Husu ba ita bo’ot sira nafatin hakmatek no kalma hodi hein to’o Governu Austrália no Korea loke filafali sira ninia fronteira hodi autoriza traballadór sira husi nasaun seluk inklui Timor-Leste”, nia akresenta.

Julião da Silva adianta, SEFOPE hamutuk ho MNEK kontinua koopera no komunika ho traballadór timoroan sira husi nasaun rua.

“SEFOPE sei kontinua ho MNEK atu koopera, kordena no komunika ho ita-nian traballadór sira iha Austrália no mós iha Korea Sul, atu nune’e bele kontinua nafatin bainhira reativa filafali sira nia aeroportu maka simu fali ita-nian timoroan sira”,  nia salienta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here