Poeta, Kompozitór no Eskritór Timoraon, Abe Barreto Soares. Imajen/Espesiál.

DILI, 20 marsu 2020 (TATOLI)—Organizasaun Naun Governamental (ONG) Timor Aid, ohin, organiza diskusaun ida ho tema “Protesaun Meiu-Ambiente: Dalan ba Prezervasaun Kultura no Eko-Turismu iha Ataúro” ne’ebé hala’o iha Arkivu & Muzeu Rezisténsia Timorense.

Organizadór ba Eventu ba Diskusaun Temátika, Bernabé Barreto Soares hateten, diskusaun ne’e nu’udar diskusaun ba daruak hosi diskusaun tolu ne’ebé mak ONG Timor Aid organiza iha ámbitu espozisaun ida ho tema “Eskultura Illa Ataúro nia-Eransa” iha Arkivu & Muzeu Rezisténsia Timorense ne’ebé hahú iha 14 fevereiru-13 Abril 2020.

“Objetivu dahuluk hosi diskusaun ida-ne’e maka atu lori autoridade sira ne’ebé serbisu iha área protesaun ambientál hodi fahe informasaun Governu nia politíka kona-ba protesaun ambientál, no mós nia planu implementasaun, espesifikamente iha Ataúru. Obejetivu daruak maka atu fó oportunidade ba artesaun no emprezáriu sira husi Ataúru, atu hato’o sira-nia serbisu no dezafiu ne’ebé sira hasoru iha sira-nia moris sosio-ekonómiku no kulturál,” dehan Organizadór ba Eventu ba Diskusaun Temátika, Bernabé Barreto Soares, liuhosi komunikadu imprensa ne’ebé Ajensia TATOLI asesu, ohin.

Nia hatutan, oradór sira ba diskusaun temátika ida-ne’e hamutuk ema na’in haat ne’ebé mai hosi Diresaun Jerál Floresta, Ministériu Agrikultura no Peska, Sekretaria Estadu ba Ambiente, reprezentante sosiedade sivil & emprezáriu ida, no bahat-na’in ida hosi Ataúro.

Nia infroma, Xefe Departamentu ba Área Protezida sira hosi Diresaun Jerál Floresta, Ministériu Agrikultura no Peska, Pedro Pinto sei ko’alia kona-ba “Polítika Governu Atuál ba Konservasaun Ambiente Florestál, espesifikamente iha Ataúru”, Sekretáriu Estadu ba Meiu-Ambiente, Deometrio Amaral sei ko’alia kona-ba “Promosaun Eko-Turismu iha Ataúro relasionadu ho Protesaun ba Meiu-Ambiente Tasi, liuliu Animál Protezidu sira”

Aleinde ne’e, iha mós reprezentante ATKOMA (Asosiasaun Turizmu Koleku Mahanak Ataúro), Lino Marques Sarmento sei ko’alia kona-ba “Prátika Di’ak kona-ba Dezenvolvimentu Eko-Turismu iha Ataúru” no ikus liu Bahat-na’in, Marcos Paicheco Noronha sei ko’alia kona-ba “Bahat-Na’in: Hatutan Eransa Kulturál iha Ataúro,” nia informa.

Entretantu, Team Leader Seksaun Kultura Timor Aid, Rosalia Madeira Soares heteten, diskusaun refere importante tanba atu halo artezaun sira komprende kona-ba importánsia prevensaun ambiente ba ita-nia moris loro-loron.

“Diskusaun ida-ne’e importante tanba atu halo artezaun sira komprende kona-ba importansia prezervasaun ambiente ba ita-nia moris loron-loron. Aleinde fó benefísiu ba eko-turizmu, prezervasaun meiu-ambiente fó mós benefísiu ba prezervasaun materia prima ba bahat-na’in sira,” Leader Seksaun Kultura Timor Aid, Rosalia Madeira Soares hateten.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here