Lansamentu ba padraun konstrusaun sistema fornesementu bee iha área rurál. Imajen/Mídia MOP

DILI, 20 marsu 2020 (TATOLI) – Governu liuhosi Ministériu Obra Públika (MOP) iha sesta ne’e, halo lansamentu ba padraun konstrusaun sistema fornesementu bee iha área rurál. 

Ministru Obra Públika, Salvador Soares dos Reis Pires, hateten presiza kualidade produsaun bee tuir padraun fornesementu nian no labele ses husi padraun ne’ebé mak Diresaun Jerál Água no Saneamentu (DGAS,sigla portugés) fó sai.

Padraun ne’e sei kaer husi ajénsia sira inklui parte husi Programa Nasionál Dezenvolvimentu Suku (PNDS) bainhira halo projetu sira iha área rurál.

“Atu dehan ami iha diploma interministeriál 2016, ne’ebé foin daudaun Ministériu Administrasaun Estatál (MAE) lori ba Konsellu Ministru hodi halo  revizaun ne’ebé hatete katak projetu bee iha área rurál ho kustu $200.000 mai kraik, ne’e kompeténsia MAE nian no implementa husi PNDS ho entidade hotu”, tenik Ministru Salvador liuhosi nota ne’ebé Agência Tatoli asesu iha MOP.

Nune’e, implementasaun projetu bee atu hasa’e númeru populasaun asesu ba bee no tenke iha armonizadu ba ninia kualidade liuhosi produsaun, tuir livru fornesimentu bee nian ho ninia padraun.

Governante ne’e adianta, daudaun ne’e lansa padraun konstrusaun, nune’e kuandu PNDS sira halo projetu iha área rurál, sira bele uza livru ne’e lansa ona sai hanesan mata-dalan ba sistema produsaun.

Atividade lansamentu no semináriu ba bee ne’e realiza husi DGAS-MOP, no partispa husi Ministru Administrasaun Estatál ein ezersísiu, Abilio José Caetano, Diretór DGAS, Gustavo da Cruz, reprezentante husi embaixada Austrália inklui PNDS.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here