Prezidenti da Republika, Francisco Guterres Lu Olo.Imajen/Antonio Goncalves

DILI, 2020 (TATOLI)—Prezidente Repúblika (PR), Francisco Guterres ‘Lú Olo’ husu Parlamentu Nasionál (PN) atu aprova lalais proposta alterasaun Lei Orsamentu no Jestaun Finanseira (LOGF-sigla portugés) hodi fó atendimentu ba situasaun iha rai-laran.

Xefe Estadu hateten, mosu dezastre natural boot ida iha munisípiu Dili iha 13 marsu liubá, udan boot no bee-sae iha mota Maloa, Becussi, Becora no Hera no fó konsekuénsia at no boot tebes ba komunidade sira.

Tuir relatóriu ikus liu hosi Servisu Protesaun Sivíl ho data 19 marsu, bee-mota lori joven ida to’o mate, ema-nain haat hetan kanek no ema rihun rua nulu resin haat atus tolu rua nulu resin aat (24.324) mak afetadu husi bee-sae iha Dili.

“Tanba ne’e husu ba Parlamentu atu aprova lalais proposta-lei alterasaun ba Lei ba Orsamentu no Jestaun Finanseira atu Governu bele foti osan lalais hodi responde ba Povu nia susar no País tomak nian,” Xefe Estadu fó-sai mensajen ne’e iha Palásiu Prezidensiál, Bairru Pité, sesta ne’e.

Xefe Estadu haktuir, Dili sai sidade taho-laran, uma naksobu ka at, família barak lakon sasán, lakon aihán no agora rai-rahun sa’e maka’as.

Prezidente Repúblika fó-sai katak, Governu presiza osan dolar amerikanu tokon rua nulu (millaun $20) atu hadi’ak infraestrutura sira ne’ebé bee sobu ka estraga, entaun Parlamentu Nasionál tenke aselera alterasaun ne’e.

Prezidente Repúblika hato’o hakoak boot no solidariedade ba maluk afetadu sira iha tempu halerik ba susar oin-oin ne’ebé hatodan sira-nia moris.

“Governu komprometidu atu rezolve problema. Nune’e, ha’u apela ba hotu-hotu serbisu hamutuk, liuliu ba instituisaun públika sira, atu apoia Governu hodi bele hatán ho efikásia ba situasaun atuál. Husu mós ba líder no partidu polítiku sira atu hamutuk haree ba Povu nia nesesidade, iha tempu susar ida ne’e,” Xefe Esatdu ne’e apela.

Notísia Relevante: PD Konsidera Proposta Alterasaun Lei Orsamentu no Jestaun Finanseira La Nesesáriu

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here