Prezidente Republika,Imajen/Media PR

DILI, 20 marsu 2020 (TATOLI)—Prezidente Repúblika, Francisco Guterres ‘Lú Olo’, fó-sai mensajen katak rezolusaun Governu nian kona-ba bandu sidadaun estranjeiru tama territóriu Timor-Leste, publika ona iha Jornál Repúblika no hahú vigora.

“Liuhosi Rezolusaun Governu nian aprova iha 16 marsu 2020 no sei publika, ohin , iha Jornál Repúblika, Governu Timor-Leste foti tán medida importante oin-oin ho karáter temporáriu no estraordináriu,” Prezidente Repúblika, Francisco Guterres ‘Lú Olo’, hato’o mensajen ofisiál ne’e Palásiu Prezidensiál, Bairru Pité, Dili, sesta ne’e.

Xefe Estadu ne’e hateten, medida importante ho karáter temporáriu no estraordinária ne’e iha oin haat (4), dahuluk sidadaun estranjeiru ne’ebé iha semana haat nia laran liu bá, hela ka liuhosi nasaun afetadu Coronavirus labele tama lai Timor-Leste.

Daruak, nia hatutan, kona-ba hatama merkadoria liuhosi portu ka aeroportu, sidadaun estranjeiru sira sei hela iha zona internasionál tuir lei migrasaun no azilu.

Datoluk, tuir nia, sei asegura posibilidade halo evakuasaun médika urjente no aviaun hodi hatama ai-moruk no materiál ospitalár mai fó tulun ba Timor-Leste.

“Pontu dahaat, nia esplika, sidadaun nasionál no sidadaun estranjeiru ne’ebé tuir rezolusaun, bele tama iha Timor-Leste, tenke tama iha kuarentina no Governu sei avalia fila-fali medida sira-ne’e fulan-fulan.

Tanba ne’e Xefe Estadu husu ba timoroan hotu atu prepara an ho ulun malirin no organizadu, atu moras ne’e karik tama sei la hada’et ba beibeik.

Notísia Relevante: KM Aprova Rezolusaun Bandu Sidadaun Estranjeira Tama Timor-Leste

Jornalista : Evaristo Soares Martins

Editór     : Cancio Ximenes

HAKEREK NO HATÁN

Please enter your comment!
Please enter your name here