Embaixadór Indonézia mai Timor-Leste, Sahat Sitorus. Imajen Tatoli/Egas Cristovao

DILI,20 marsu (TATOLI)-Governu Indonézia liuhosi ninia Embaixadór iha Timor-Leste,Sahat Sitorus deklara Governu Indonézia seidauk hasai desizaun atu hapara importansaun Sasán nesesidade báziku mai Timor-Leste relasiona ho prevensaun ba kazu coronavirus.

Governu Indonézia komesa iha kinta (19/03/2020) taka ona movimentu ema iha Fronteira terrestre Motain, Munisípiu Bobonaro, Salele Munisípiu Covalima no Wini iha Rejiaun Autónomu Espesiál Oé-Cuse Ambeno (RAEOA).

“Seidauk bandu sasán hosi Indonézia mai Timor-Leste tanba ne’e la presiza rai indomilk to’o kaixa 10 iha uma depois estragu,”katak Embaixadór Indonézia ne’e ba Jornalista sira iha Edifísiu MNEK, Praia dos Coqeiros Dili, sesta (20/03/2020).

Tanba ne’e nia dehan, Indonézia sei esforsu atu garante importasaun sasán nesesidade báziku mai Timor-leste ho di’ak no la nakotu.

Nia dehan, Sidadaun Indonézia kuaze 900 maka hela iha Timor-Leste maibé to’o sesta ohin seidauk iha ida maka hakarak evakua ba sira-nia rai.

Maibé nia apela ba sidadaun Indonézia ne’ebé halo paseiu iha Timor-Leste, di’ak liu fila ona ba ida-idak nia orijén.

Sahat Sitorus, orgullu ho Timor-Leste tanba to’o ohin seidauk iha pasiente maka hetan ona infesaun coronavirus.

Jornalista : Agapito dos Santos
Editór       : Agapito dos Santos

HAKEREK NO HATÁN

Please enter your comment!
Please enter your name here