Imajen IRI.

Atividade diskusaun meza redonda ne’e hala’o ho objetivu halibur membru Parlamentu husi Komisaun G ba Asuntu Edukasaun, Juventude, Kultura no Sidadánia, no orgánizasaun sosiedade sivíl sira ne’ebé halo advokasia iha asuntu edukasaun nián hodi hato’o sira-nia problema no preokupasaun ne’ebé duránte ne’e sira hetán liuhosi sira-nia peskiza.

DILI, 28 marsu 2020 (TATOLI)—Orgánizasaun Internasionál Repúblikánu Institutu (IRI), orgániza atividade diskusaun meza redonda hodi haforsa jestaun no fasilidade atu hasa’e dezempeñu serbisu iha área edukasaun nian.

Atividade diskusaun meza redonda ne’e partisipa hosi sosiedade sivíl no membru Parlamentu Nasionál sira ho tema “Dezenvolve Sistema Edukasaun hodi Hadi’a Kualidade Ensinu Sekundáriu no Superior”.

Atividade diskusaun meza redonda ne’e hala’o ho objetivu halibur membru Parlamentu husi Komisaun G ba Asuntu Edukasaun, Juventude, Kultura no Sidadánia, no orgánizasaun sosiedade sivíl sira ne’ebé halo advokasia iha asuntu edukasaun nián hodi hato’o sira-nia problema no preokupasaun ne’ebé duránte ne’e sira hetán liuhosi sira-nia peskiza.

“Ha’u sente ita ko’alia kona-ba edukasaun, ita-nia problema ne’e iha kualidade edukasaun. Ita ko’alia barak kona-ba kualidade maibé kualidade ne’e refere ba investimentu edukasaun. Tánba ita ko’alia kona-ba kualidade ne’e, la mai baratu maibé kualidade ne’e mai ho osán,” dehán Pedro Ximenes, liuhosi diskusaun meza redonda ne’ebé orgániza hosi IRI, iha salaun Reuniaun TOWER CONFERENCE, Fatuhada, sesta (20/3/2020).

Nia hatután, agora ita haree tok ita-nia investimentu edukasaun iha Timor-Leste ne’e hira. Ita-nia investimentu iha Timor-Leste bazeia ba Orsamentu Jerál Estadu agora daudaun tinán 2019 ne’e se la sala la to’o porsentu neen.

Nia dehán duránte ukun-án to’o agora i investimentu iha área edukasaun foin to’o porsentu hitu kompara ho nasaun sira seluk ho padraun ne’ebé mak UNESCO hato’o loloos ne’e ba nasaun sira ne’ebé mak sub-dezenvolvidu hakarak dudu nia-án ba nasaun dezenvolvidu nia tenke investe porsentu 15, to’o 16 di’ak liu tán TYimor-Leste bele to’o porsentu 20.

“Kona-ba polítika, ha’u-nia opiniaun polítika edukasaun jerál husi leten tun mai kraik ne’e di’ak ona maibé ida ne’ebé mak falta ne’e mak konsisténsia implementasaun ne’e mak la iha. Ha’u haree ba em termos kada ensinu sekundáriu ne’e di’ak ona maibé ita fila fali ba kestaum kualidade, ita haree liu ba asesu de’it, ita la duun foka iha kualidade. Estudu barak ne’e hatudu ona katak ita ne’e kualidade ensinu sekundáriu agora ne’e se kompara ho nasaun seluk, ita tinán haat ba kotuk,” nia tenik.

Iha parte seluk, Responsável Asosiasaun Defisiénsia Timor-Leste, Cesario da Silva hato’o nia prekupasaun kona-ba defisénsia balu tama ona ba universidade hanesan Universidade Nasionál Timor Lorosa’e (UNTL) no Universidade Orientál (UNITAL) maibé seidauk iha profesór ida atu hanorin kona-ba jestu ba lian.

“Agora dadauk defisiente na’in rua tama ona UNTL liuhusi kánal espesias maibé univesidade rasik la iha meu hanorin, nune’e hosi ami-nia parte fasilita tán tradutor ida ba akompaña sira. Difisiénsia tilun sira presiza lian jestu hodi eskola, mestri sira tenke hatene hodi hanorin, maibé situasaun saida mak akontese agora mak mestri hotu-hotu la hatene. Iha Tomor-Leste foin na’in haat mak hatene,” dehan Cesario.

Nia hateten, fiar katak husi Nai Deputadu sira lori sira-nia preokupasaun sira ne’e ba hato’o iha Parlamentu Nasionál no husu ministériu kompotente atu tau prioridade.

Hatán ba kestaun hirak ne’e, Membru Komisaun G, Deputada Gabriela Alves, konsidera hanoin hirak ne’e pertinente tanba sai mós preokupasaun reprezentante povu sira-nian iha Uma Fukun Parlamentu Nasionál.

“Ha’u haksolok no agradese tebes ba ita-boot sira-nia preokupasaun ne’e. Tanba ami hanesan reprezentante povu, ami tun halo fiskalizasaun ba eskola sira, ami haree duni hanesan ita-boot kestiona kona-ba infraestrutura. Ha’u hanesan matan, tilun ba povu nian, ha’u haksolok. Ha’u-nia knaar, ha’u sei hato’o ba ministériu kompotente mak atu halo jestaun,” nia dehán.

Entretántu, Jerente Seniór Programa IRI, Karlito Nunes, hateten atividade meza redonda hala’o ho intensaun sosiedade sivíl sira bele hato’o preokupasaun kona-ba serbisu sira ne’ebé relasaun iha área edukasaun-nian.

“Meza redonda ida-ne’e, ba dala rua nian ba asuntu iha setór edukasaun nian. Entaun objetivu mak konvida membru Parlamentu husi Komisaun G ba asuntu Edukasaun, no sosiedade sivíl sira ne’ebé liuliu halo advokasia iha asuntu edusaun, entaun sira hato’o ho problema no prekupasaun sira ne’ebé mak durante ne’e sira iha atreves husi sira-nia peskiza no dadus ne’ebé iha, sira hato’o ba membru Parlamentu Nasionál hánesán reprezentante povu,” nia tenik.

Organizasaun Sosiedade sivíl hira ne’ebé partisipa iha meza redonda ne’e mak Fundasaun Euros, Fundasaun Neon Metin (FNM), Instituisaun Superior Cristal (ISC), FOKUPERS, TLCE, RHTO, ADTL, CEO IOB/ETI.

Jornalista : Osória Marques

Editór      : Cáncio Ximenes

HAKEREK NO HATÁN

Please enter your comment!
Please enter your name here