Prezidente Repúblika, Francisco Guterres Lú Olo. Imajen Mídia PR

DILI, 20 marsu 2020 (TATOLI)—Prezidente Repúblika (PR),  Francisco Guterres ‘Lú Olo’ fó-sai katak Governu prepara fatin espesífiku tolu atu antesipa Coronavirus mak iha Tibar, Sentru Saúde  Formosa no Klinika Vera Cruz.

“Governu hili ona Tibar nu’udar fatin kuarentena. Katak, sei lori ba iha ne’ebá, ema sira ne’ebé mai hosi país afetadu ka hetan ona vírus korona, ka ema iha ona kontaktu ho ema ne’ebé iha moras coronavírus. Durante kuarentena, sira sei halo teste no bainhira hatene ona rezultadu katak la moras, mak husik sira sai hosi fatin ne’e,” Xefe Estadu hato’o mensajen ne’e iha Pálasiu Prezidensiál, Bairru-Pité, sesta ne’e.

Sira ne’ebé kazu suspeitu, Xefe Estadu ne’e hatutan, katak hatudu sintoma ruma maibé seidauk hatene loloos iha ka lae moras ne’e, pesoál saúde sei lori ba hela iha sentru saúde iha Formosa no kazu ba kazu konfirmadu sira, tratamentu sei halo iha Klínika Vera Cruz.

Xefe Estadu ne’e subliña, Governu prepara daudaun fatin sira ne’e no tenke foti medida ho kuidadu hotu-hotu atu fatin sira ne’e labele fó risku ba komunidade sira ne’ebé hela hale’u iha fatin hirak ne’e.

“Ha’u husu ba maluk idak-idak atu fó apoiu ba Governu atu implementa medida sira ne’e hodi proteje komunidade no país tomak. Ne’e katak ema ne’ebé suspeitu ka iha ona infesaun tenke tama kedas iha fatin sira ne’ebé Governu prepara,” Xefe Estadu fó hanoin ba komunidade

Tanba ne’e, Xefe Esadu hateten, Timor-Leste presiza aprende hosi esperiénsia di’ak nasaun sira seluk nian, ne’ebé hatene ona oinsá prevene no kombate moras COVID-19 hanesan Xina, Singapura, Vietname no Makau hatudu ona dalan di’ak.

“Ita tauk to’o sai pániku, la ajuda ita hasoru virus ne’e. Importante mak oinsá ita prepara-an no ajuda maluk sira seluk prepara sira-nia an mós, iha munisípiu hotu-hotu. Liuliu ita-nia maluk idozu sira, ne’ebé sofre hela ho moras seluk no ita-nia membru komunidade sira ne’ebé vulnerável liu. Ita hotu-hotu, Estadu no sosiedade tomak tenke fó liman ba malu atu prevene no kontrola Coronavírus, karik tama iha Timor-Leste,” nia dehan.

Prezidente Repúblika husu ba timoroan tomak tenke fase-liman beibeik ho sabaun ka uza dezinfetante ruma, hanesan álkol, labele kaer beibeik ita-nia oin, karik ita la fase uluk, prátika ijiene respiratóriu, taka ibun no inus ho liman sikun wainhira fani.

Nune’e mós, tuir PR, bainhira uza tixu, soe tixu foer ba lixu fatin ho matan, hadook-an hosi ema ne’ebé me’ar ka fani maibé labele hatudu katak hakribit sira, importante buka ajuda sira.

Notísia Relevante: Prezidente Repúblika Kontinua Apoia Ekipa Prevensaun Coronavirus

Jornalista : Evaristo Soares Martins 

Editór      : Cancio Ximenes

HAKEREK NO HATÁN

Please enter your comment!
Please enter your name here