Imajen Tatoli/Osória Marques

DILI, 20 marsu 2020 (TATOLI)–Gabinete de Apoio á Actividade do Cónjuge do Presidente do República liuhosi Espoza Prezidente Republika, ohin, simbolikamente entrega apoiu materiál ba vítima inundasaun sira iha Becora Temporária (Eis-Merkadu Becora), Postu Administrativu Cristo Rei, Munisípiu Dili.

Espoza Prezidente Republika, Cidália Nobre Lopes Guterres hateten, kuaze komunidade barak mak afeta hosi inundasaun maibé komunidade afetadu balun hetan ona apoiu no komunidade afetadu iha Becora Temporária mak seidauk hetan apoiu ruma hosi Governu ka ema seluk.

“Durante ne’e ita hotu hatene katak komunidade barak mak afeta husi inundasaun. Ha’u mós akompaña iha komunidade afetadu barak mak simu ona maibé iha fatin ida ne’e mak seidauk hetan. Entaun, husi gabinete ami-nian, ohin lori sasán, mai fahe ba afetadu sira iha ne’e,” dehan Espoza Prezidente Republika, Cidália Nobre Lopes Guterres, ba jornalista sira iha Becora Temporária, Dili, ohin.

Nia informa, sasán ne’e mak gabinete PR fahe ba afetadu inundasaun sira iha fatin Becora Temporária sira mak hanesan fós marka “Nasi Enak” 25 kg karon 182, mina marka “Bintang” dos 37, bunga softhener dos 20, supermie dos 80, raga tau etu nian 30, bikan milanium duzia 30, manta 40, kulsaun 40, tasu dadang ekonomis 60, tasu 60, balde 30, vaskom 30, kanuru han nian duzia 60 no Konteiner 10.

“Ida ne’e, hanesan nesesisdade bázika ne’ebé mak ita-nia komunidade sira presiza iha momentu emerjénsia ida ne’e,” nia dehan.

Nia hatutan, gabinete espoza prezidente hamutuk ho kaza sivíl haruka sasán ba parte Protesaun Sivíl nian mak foin fahe ba vítima afetadu sira maibé horikalan informsaun fó sai katak komunidade Becora Temporária seidauk hetan apoiu ruma.

“Horikalan ami mós akompañia hela informasaun katak afetadu sira husi ne’e seidauk hetan apoiu ruma hosi Governu. Tanba ne’e, ohin, ami lori sasán mai iha ne’e,” nia esklarese.

Nia heoin katak, aban ka bainrua Governu no Estadu oinsá prepara di’ak liután atu fó apoiu nesesidade bázika ne’ebé mak komunidade sira presiza.

Entretantu, Koordenadór Becora Temporária, Adelino Mascarenhas informa, komuidade sira afeta ba inundasaun iha Becora Temporária hamutuk uma-kain 207 maibé ida ne’e sei hanesan dadus provizóriu hela.

“Ha’u-nia komunidade Becora Temporária ne’ebé mak hetan afeta ba inundasaun hamutuk uma-kain 207. Maibé, ha’u klasifika ba fatin tolu. Primeiru klase mak afetadu sira iha mota ninin, tanba ha’u konsidera sira-nia sasán la iha tiha kedas. Segundu klase mak ba afetadu sira iha klaran tanba sira-nia uma taho nakonu tiha sira-nia fatin no sasán hotu dodook. Terseiru klase mak sira parte leste nian tanba sira-nia sasán balu salva no balu la salva,” Koordenadór Becora Temporária, Adelino Mascarenhas, hateten.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here