Inundasaun ne'ebe akontese iha sesta (13/03/2020) iha Kapital Dili

DILI, 19 marsu 2020 (TATOLI)–Sekretaria Estadu Protesaun Sivíl (SEPS) durante ne’e distribui ona ajuda emerjénsia ba vítima inundasaun uma-kain 450 ne’ebé daudaun ne’e identifika ona ho totál uma-kain 2650.

Diretór Jerál Protesaun Sivíl, Ismael da Costa Babo informa, daudaun ne’e SEPS kontinua foka ba apoiu emerjénsia ba vítima sira hodi sira bele sobrevive semana ida ka rua hodi bele hamoos sira-nia uma hafoin haree fali ba prosesu faze seluk.

“Agora daudaun ne’e família vítima sira ne’ebé hetan ona ajuda ne’e uma-kain hamutuk 450. Hosi parte Hera uma-kain 95, Bidau Santa Ana uma-kain 13, Becora uma-kain 229, Santa Cruz uma-kain 113. Nune’e, falta uma-kain 1200 mak seidauk simu apoiu emerjénsia hosi SEPS,” dehan Ismael da Costa Babo ba Agência TATOLI iha nia knaar fatin, Caicoli, Dili, ohin.

Diretór ne’e afirma, iha parte balu seidauk hetan apoiu tanba ekipa sei tun halo identifikasaun kada uma-kain afetada inundasaun ida-idak hodi halo levantamentu ba dadus ne’ebé loloos.

“Ami nia ekipa sei tun hela ba halo identifikasaun, para ita bele identifika loloos uma-kain ne’ebé maka iha direitu simu ajuda. Atu nune’e, ita fahe mós labele fahe sala. Ita espera, aban ka bainrua bele kompletu ona,” nia dehan.

Nia hatutan, vítima sira ne’ebé maka evakua ba iha fatin SEPS nian no fatin evakuasaun fila ona ba sira-nia fatin maizumenus uma-kain hamutuk 80 resin.

Diretór Jerál SEPS, Superintendente Asistente Polísia, Ismael da Costa Babo. Imajen/Egas Cristovão

Ba ajuda rekoperasaun, Ismael hateten, proposta halo ona ba utilizasaun fundu kontijénsia hodi haree ba asuntu ne’e, nune’e ita espera bele aprova lalais hodi ezekuta.

“Iha reuniaun Konsellu Ministru ami halo ona proposta hato’o ba fundu kontijénsia, ita espera bele aprova lalais hodi ezekuta,” nia dehan.

Diretór Jerál SEPS relata, dadus kompletu sei tuirmai tanba ekipa sei kontinua halo hela serbisu foti dadus ba familia afetadu seidauk ramata.

“Ami-nia operasaun estabelese dezde sesta no sei kontinua to’o maluk sira-ne’e hetan hotu emerjénsia,” nia dehan.

Notísia Relevante: SEPS Prepara Ekipa 12 Halo Identifikasaun Dadus Ba Komunidade Afetadu Lalubur

Jornalista : Nelia Borges

Editór      : Cancio Ximenes

HAKEREK NO HATÁN

Please enter your comment!
Please enter your name here