DILI, 18 marsu 2020 (TATOLI)–Vítima afetada lalubur, Lúcia da Costa de Jesus, husu ba Governu liuhosi Ministériu Edukasaun Juventude no Desportu (MEJD) atu fó aoiu materiál eskolár ba labarik estudante sira ne’ebé afetada ba lalubur.

“Ha’u preokupa mak ha’u-nia oan sira nia roupa eskola nian tanba roupa mota lori no dodok hotu, ho ne’e labarik sira labele ba eskola. Karik, Governu liuhosi Ministériu Edukasaun Juventude no Desportu bele ajuda netik ha’u-nia oan sira. Ha’u-nia sasán laiha ida mak di’ak. Tantu sasán dapur nian no mós ha’u-nia oan nia roupa eskola, televizaun, jelera, armáriu no osan balu ne’ebé mak bee lori no hakoi lakon hotu,” dehan Lúcia da Costa de Jesus ba Ajénsia TATOLI iha nia hela fatin Because-Kraik, Suku Becora, Postu Administrativu Cristo Rei, Munisípiu Dili, kuarta ne’e.

Nia hatutan, daudaun ne’e hosi parte igreja Becora nian mak lori netik hahan ba afetadu sira iha Because-Kraik hodi sira auguenta ba loron haat.

Nia dehan,  horiseik mak parte hosi Governu ajuda fahe hahan mak foos, supermie, agua no seluk tan no la’ós hahan mak lona, tirina etu no modo nian, biti, no basia fase bikan ba sira.

“Ami augenta hela ho ajuda hosi igreja Becora ne’ebé mak fó foos no paun nune’e mós husi governu nian. Ha’u hanoin hahan ne’e sufiente ona ba ami familia ne’e,” nia dehan.

Maski hetan ona ajudu. nia hateten, maibé rice cooker no ahi-matan laiha ne’e tein halo oinsa, ne’ebé pasiénsia han de’it ona mak paun ho bee ne’ebé iha.

“Ami la’ós ahi-matan mak laiha hodi tein maibé mota mak lori hotu tiha no balu dodok ona. Ita atu husu viziñu nian maibé hotu-hotu afetadu ba inundasaun ne’e. Ami viziñu estrada kraik no leten hamutuk de’it hahan tasak nian hanesan paun ne’ebé amu sira husi igreja Becora oferse ba ami,” nia hatete ho matan been nakonu.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here