Ai-moruk herbal. Foto/Google.

DILI, 19 marsu 2020 (TATOLI)-Responsavél Dentária Sentru Saúde Comoro, Vicente dos Santos, hateten dadaun ne’e nia parte menus medikamentu orál ne’ebé uza hodi fokit nehan.

Problema falta ai-moruk nehan ne’e akontese ona iha fulan-janeiru 2020 no fulan-marsu ne’e. Maibé iha fulan-fevereiru liubá, Ministériu Saúde distribui ona medikamentu orál ba sentru Saúde Comoro maibé estoke hotu ona.

Ho limitasaun medikamentu ne’e maka nia parte labele halo tratamentu no fokit pasiente sira-nia nehan.

Iha fulan-janeiru pasiente nehan ne’ebé rejistu atu fokit nehan hamutuk 300-resin maibé la konsege tanba falta ai-moruk orál.

”Aimoruk bius mós laiha durante fulan marsu ne’e to’o agora ami hetan de’it pasiente 20 to’o 24 mak mai konsulta,” dehan Nia ba Jornalista sira iha Comoro, kinta (19/03/2020).

”Se hakarak solda ami solda maibé losu ami la losu tanba ai-moruk nehan nia anestesia ne’e laiha no ekipamentu mós la sufisiente ona tanba ekipamentus nehan iha rua maibé ida a’at ona entaun ida seluk mak di’ak maibé aimoruk laiha,”katak nia.

Nia parte relata ona problema ne’e ba Ministériu Saúde maibé to’o agora seidauk hetan resposta hodi distribui medikamentu hirak ne’e.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here