Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 19 marsu 2020 (TATOLI)—Proposta alterasaun datolu kona-ba Lei Orsamentu no Jestaun Finanseira (LOGF-sigla portugés) sei debate iha plenária Parlamentu Nasionál, iha segunda-feira, semana oin.

Prezidente Parlamentu Nasionál, Arão Noé de Jesus da Costa Amaral hateten, ohin, líder bankada sira aprova ona pedidu hosi Governu ho karatér urjénsia. Iha reuniaun líder bankada ne’e, marka prezensa hosi reprezentante Governu atuál Ministru Reforma Lejizlativa no Asuntu Parlamentár (MRLAP), Fidelis Leite Magalhães.

“Ami Haree katak asuntu balun importante tebes tanba ne’e mak segunda-feira semana oin ajenda debate pedidu urjénsia ne’ebé aprezenta mai kona-ba alterasaun lei orsamentu no jestaun finanseira. Se segunda-feira konklui, tersa-feira ami kontinua ba Konta Jerál Estadu 2018 nian,” dehan Prezidente Parlamentu Nasionál, Arão Noé de Jesus da Costa Amaral, ba jornalista sira iha Parlamentu Nasionál,

Tuir nia, Governu halo pedidu atu halo alterasaun ba artigu 31 hosi lei númeru 13/2019, 21 outubru, ne’ebé ko’alia mós kona-ba duodésimu, katak atu fó esepsaun (fleksibilidade) ruma, esepsaun balu liga ba oinsá governu bele uza oorsamentu ne’e iha pontu balu ke bele liuhosi duodesimál.

Nia fó ezemplu, aluga uma ba embaixadór sira iha rai-li’ur, sira-nia kontratu kada tinan no balu kada fulan-neen.

“Se tinan ida tenke selu tinan-ida nian, labele selu uitoan-oituan hanesan duodésimu nian entaun ho ida-ne’e mak governu husu para bele fó alterasaun lei hodi fó esepsaun ida to’o iha tempu selu ne’e, governu foti liu hodi haruka selu. Se selu ona, fulan tuir mai la’o normál ona katak esepsaun iha tempu de’it,” nia dehan.

Nune’e, hanesan ba selu terseira idade sira tanba governu selu kada fulan-neen dala-ida entaun to’o fulan-neen atu selu terseira idade nian entaun governu tenke foti orsamentu ho montante boot.

“Se haree tuir duodésimu lato’o atu-bele selu entaun tenke iha autorizasaun esepsu ida hodi halo ida-ne’e. Ezemplu ida mak Coronavirus la’o maka’as loos entaun oinsá ita-nia preparasaun. Se governu presiza karik atu sosa aimoruk, mákina no ekipamentu ruma ho urjénsia, ne’ebé presiza osan liu montante duodésimál nian,” nia hateten.

Nia haktuir, tuir Rejimentu Parlamentu Nasionál (RPN) artigu 97 sei baixa ba Komisaun C (Finansas Públika) no komisaun sei iha tempu 24 oras halo relatóriu no pareser.

“Tanba aban sesta, entaun komisaun iha tempu atu halo relatóriu no pareser. Tanba ne’e mak ami fiksa ba segunda-feira hodi halo debate,” nia dehan.

Notísia Relevante: PN Simu Ona Proposta Alterasaun Lei Orsamentu no Jestaun Finanseira

Jornalistaé : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here