Primeiru-Ministru, Taur Matan Ruak. Imajen/ Egas Cristovao

DILI, 19 marsu 2020 (TATOLI)–Primeiru-Ministru, Taur Matan Ruak hateten, Governu Timor-Leste iha ona Planu prevensaun Coronavirus hanesan mós nasaun avansadu sira uza mak hanesan halo distánsia sosiál maibé ida ne’e aplika iha Timor-Leste bainhira tama iha ‘Estádu Emerjénsia’. 

“Iha prevensaun ida ne’ebé bolu dehan, distansiamentu sosiál. Katak, bandu ema labele la’o ba la’o mai, labele halibur malu, hotu-hotu iha uma de’it. Ba loja karik, labele. Maibé ida ne’e liga ba estadu emerjénsia,” dehan Primeiru-Ministru, Taur Matan Ruak, ba jornalista sira hafoin hala’o enkontru semanál ho Prezidente Repúblika (PR), Francisco Guterres “Lú Olo”, iha Palásiu Prezidensiál Bairru Pité, Dili, kinta ne’e.

Tanba ne’e, taur hatutan, ko’alia kona-ba direitu no liberdade fundamentál ema nian, iha artigu 25 Konstituisaun Repúblika Demokrátika Timor-Leste, sirkulasauan hatuur iha artigu 44, liberdade iha artigu 30, reuniaun ho manifestasaun iha artigu 42 ne’e, só estadu emerjénsia mak ita halo.

“Ezemplu, ita labele haruka misa para. Ita labele haruka ema para husi movimentu. Bainhira ita haruka ema para, ne’e ita viola ita ninia konstituisaun,” nia hateten.

Xefe Governu ne’e reforsa, bainhira Timor-Leste tama iha situasaun ida katak moras Coronavirus ne’e tama ona iha Timor-Leste, tenke halo duni ho autorizasaun hosi Xefe Estadu atu bele dekreta estadu emerjénsia.

“Tanba ne’e maka tenke husu autorizasaun atu deklara estadu emerjénsia, karik ita tama iha situasaun ida ne’e. Bainhira moras ne’e kuandu iha, entaun situasaun ne’e tenke tama duni,” PM Taur deklara.

Entretantu, Ezekutivu sira liuhosi soru mutu Konsellu Ministru (KM) estraordinária, deside solisita Prezidente Repúblika (PR), Francisco Guterres ‘Lú Olo’, hodi dekreta Estadu Emerjénsia relasiona ho evolusaun no preokupasaun ba situasaun epidemiolójika ba kazu rejistadu husi Coronavírus ka COVID-19 iha eskala globál.

Notísia Relevante: PR iha Kompeténsia Dekreta Estadu Emerjénsia

Jornalista  : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here