Ekipa Konjunta Polísia Nasionál Timor-Leste (PNTL), Diresaun Nasionál Transporte no Terrestre (DNTT), Diresaun Nasional Patrimóniu Estadu (DNPE) no Komisaun Anti Korrupsaun (CAC) hala’o apreensaun ba karreta estadu sia (9) iha Ministériu Edukasaun Vila-Verde Dili ne’ebé ninia mákina no kadeira tuur fatin ema sobu hotu ona. Imajen/Eugénio Pereira

DILI, 19 marsu 2020 (TATOLI) – Komandante Jerál Polísia Nasionál Timor-Leste (PNTL), Komisáriu Faustino da Costa, informa, Komandu PNTL prepara ona proposta atu altera lei kódigu estrada hodi fó podér ba Polísia Unidade Tránzitu atu kontrola motorista sira ne’ebé lori transporte públiku ka estadu nian bainhira soke rahun sasán ka patrimóniu estadu iha estrada públiku tenke selu multa ba estadu.

Maski la sita númeru lei kódigu estrada  ne’ebé presiza atu revee, maibé Komisáriu Faustino da Costa, afirma tan katak,  presiza aumenta-tan artigu balun hodi haforsa lei ne’e atu fó kompeténsia ba PNTL halo kontrolu sasán patrimóniu estadu bainhira ema ruma soke estraga tenke hetan sansaun.

 Komisáriu Faustino da Costa dehan, durante ne’e Komandu PNTL sempre simu relatóriu husi Departamentu Tránzitu PNTL kada munisípiu rejista númeru asidente tráfegu envolve lori karreta no motór estadu soke rahun no karreta privadu ou públiku balun soke estragu sasán estadu nian hanesan, riin eletrisidade iha estrada ninin, trotoar no paving inklui moru edifísiu estadu nian,  maibé laiha sansaun.

 “Problema sira ne’e hotu maka ami agora prepara hela proposta alterasaun lei kódigu estrada. Porezemplu, ita haree kuandu sidadaun ida soke tiha riin eletrisidade ida monu tun, ne’e vítima iha ka lae. Dala-balun, ita dehan, ne’e asidente úniku laiha vítima, maibé bainhira ita haree didi’ak sasán sira ne’e bainhira mak estadu buka fali osan para atu sosa fali hodi troka ida aat ne’e,” afirma Afonso da Costa, ba jornalista, ohin, iha Kuartél Jerál PNTL, Caicoli, Dili.

Komandante ne’e hatutan, dala-ruma motorista balun malandru ho karreta soke monu tiha sinais tránzitu iha estrada monu tiha ba rai, sira kontinua halai husik hela sasán sira ne’e.

“Agora sei ita monta sinais tránzitu sira ne’e atu asegura ema hothotu nia-vida iha estrada. Se ita ba sobu tiha, estadu maka lakon. Tanba ne’e Komandu propoin se maka estraga sasán patrimóniu estadu ne’e nia tenke selu,” Faustino afirma tan.

Iha Dili laran, Komisáriu Faustino tenik,  dala barak ema soke monu besi riin iha Ponte CPLP, riin eletrisidade no moru Jardin Saudozu Prezidente Nicolau Lobato, Comoro, maibé autór sira la-responsabiliza atu hadi’a hikas sasán estadu hirak ne’e.

Antes ne’e, Pontu Vokál Ekipa Konjunta husi Patrimóniu Estadu, Cipriano do Rosario Pereira dehan, dala barak funsionáriu públiku sira bainhira lori karreta estadu soke estraga tiha sasán estadu sira la responsabiliza.

Nia dehan, problema ida ne’e rasik, ekipa operasaun konjunta, Diresaun Nasionál Transporte Terrestre (DNTT), Diresaun Nasionál Patrimóniu Estadu (DNPE) no Komisaun Anti Korrupsaun (CAC), Komisaun Funsaun Públika (CFP) no Polísia Nasionál Timor-Leste (PNTL) diskute ona sei aprezenta problema hirak ne’e ba membru governu sira para buka solusaun.

Cipriano rekoñese dala-ruma funsionáriu públika balun lori tiha karreta estadu uza ba interese privadu, depois iha dalan mosu asidente soke aat tiha, sira halo fali proposta falsu aprezenta ba liña ministériu maka tenke hasai osan hodi hadi’a sasán estadu.

Jornalista : Eugénio Pereira

Editór       : Francisco Simões

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here