Imajen/Foti hosi google

DILI, 19 marsu 2020 (TATOLI) – Arguidu AD, ohin loron, tenke kumpre desizaun Tribunal Distritál Dili (TDD) hodi ba ‘deskansa’ iha prizaun preventiva tanba komprova komete krime arma branka.

Liuhosi audiénsia primeiru interrogatóriu iha TDD, kuarta (18/03/2020), Juiz singular João Ribeiro, aplika medida koasaun prizaun preventiva tanba komprova lori “samurai” rua hodi ameasa lezadu ne’ebé hanesan arguidu nia amigu.

Tuir depoimentu ne’ebé aprezenta hosi Prokuradór Ivónia Guterres, ne’ebé reprezenta Ministériu Públiku iha audiénsia primeiru interrogatóriu ne’e katak, arguidu ho lezada hemu hamutuk hela iha area Bairru-Pité, Dili.

Bainhira lanu uitoan, arguidu ho lezadu abuza-malu hanesan amigu di’ak hodi koko forsa no tuku-malu halimar. Maibé, iha minutu balun nia-laran lezadu sente arguidu tuku sériu no makaas tebes. Ho nune’e, lezadu mós responde ho tuku makaas.

Derrepente de’it, arguidu halai tama ba nia uma-laran foti kedas “samurai” rua  hodi duni atu taa tiha lezadu. Ho nune’e, lezadu ta’uk halai kedas ba salva-an iha estasaun polísia ne’ebé besik no sertamente polísia foti medida kaptura kedas arguidu.

Ho aktu ne’e, Ministériu Públiku (MP) liuhosi prokuradór Ivónia Guterres, promove ba arguidu AD ho krime armas branka iha lei númeru 05/2017.

Defeza Germano Guterres ne’ebé fó asisténsia legal ba arguidu afirma, razaun tribunal aplika medida ba nia kliente tanba tuir konviksaun tribunal nian atu halo prevensaun ba kriminozu-sira no asegura arguidu iha prosesu julgamentu tuir mai.

Hanesan defeza, Germano Guterres, la aseita ho desizaun tribunál nian, tanba haree ba sirkunstánsia hosi kazu ne’e, só merese atu aplika medida koasaun aprezentasaun periódika.

“Durante prazu loron 15,  ha’u hanesan defeza sei halo rekursu ba Tribunál Rekursu,” hateten Germano Guterres.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here