Primeiru-Ministru, Taur Matan Ruak. Imajen Tatoli/ Egas Cristovão

DILI, 19 marsu 2020 (TATOLI)–Oitavu Governu Konstitusionál halo ona levantamentu dadus ba vítima dezastre naturál  iha Dili laran no hosi rezultadu ne’e hatudu katak Governu presiza orsamentu rekoperasaun hamutuk millaun $20 hodi responde ba dezastre naturál.

“Kona-ba dezastre naturais ne’e ita halo ona levantamentu, maski seidauk totál, maibé sira ne’ebé agora ita hatene ninia estragus atinje valór mais de vinte miloens dólar Amerikanu,” dehan Primeiru-Ministru, Taur Matan Ruak, ba jornalista sira hafoin hala’o enkontru semanál ho Prezidente Repúblika (PR), Francisco Guterres “Lú Olo”, iha Palásiu Prezidensiál Bairru Pité, Dili, kinta ne’e.

Xefe governu ne’e hatutan, númeru ne’e atinje populasaun nian, no mós infra-estrutura fízika sira, hanesan eletrisidade, bee-moos, estrada, iha ninia kustu hamutuk millaun $20 resin.

“Governu oras ne’e halo hela esforsu ba rekoperasaun infraestrutura sira ne’e, rekorre fali fundu infra-estrutura sira no ba iha apoiu emerjénsia ba rekoperasaun populasaun sira. Ita sei haree iha kontinjénsia maibé ita iha hela períodu duadésimu tanba Kontinjénsia ne’e kiik liu,” Taur hateten.

Tanba ne’e, nia informa, foin daudaun sira halo hela desizaun rua iha Konsellu Ministru nian, aprova proposta leí ida atu bele halo levantamentu, husu autorizasaun Parlamentu Nasionál nian atu bele halo levantamentu ba fundu petrolíferu.

“Iha semana liu ba, ami propoin alterasaun lei orsamentu jestaun finanseira, atu bele fó dalan liután ba Governu hodi responde ba ita nia kompromisu nasionál no internasionál,” nia esplika.

Entretantu, dadus provizóriu ne’ebé fó sai husi Sekretáriu Estadu Protesaun Sivíl, Alexandrino Xavier Aráujo, haktuir katak provizoriamente populasaun afetada iha munisípiu Dili, husi inundasaun iha sesta loron 13 fulan marsu hamutuk 9.126.

Notísia Relevante: KM Analiza Estragu Sira Ne’ebé Provoka Husi Udan-Boot

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here