Ministru Reforma Lejizlativa no Asuntus Parlamentares Fidelis Manuel Leite Magalhães. Imajen/Egas Cristovao

DILI, 19 marsu 2020 (TATOLI)—Ministru Reforma Lejizlativa no Asuntu Parlamentár, Fidelis Leite Magalhães hateten, proposta alterasaun Lei Orsamentu no Jestaun Finanseira ne’e Governu husu ho pedidu karatér urjénsia tanba kestaun kontratu hela-fatin misaun diplomátika sira iha rai-li’ur no situasaun COVID-19 no problema bázika sira iha rai-laran.

“Pedidu ne’e ho karatér urjénsia tanba baibain embaixadór sira aluga uma iha rai-li’ur, ema hakarak selu tinan tomak. Se ho situasaun duodésimál ne’e, ita só bele selu kada fulan. Se ita hanesan ne’e kontinua saida mak akontese, entaun ita-nia misaun diplomátika sira iha rai-li’ur ema duni sai hotu tanba ema lakohi halo kontratu ho ita. Tanba ne’e mak alterasaun ne’e atu fasilita Governu liuhosi Ministériu Negósiu Estranjeiru selebra,” dehan Fidelis Leite Magalhães ba jornalista sira hafoin partisipa reuniaun líder bankada sira iha Parlamentu Nasionál, kuarta ne’e.

Nia esplika, ho proposta alterasaun ne’e hanesan esesaun ba situasaun ne’ebé ne’ebé la espera tanba la altera ne’e susar ba Governu atu halo kontratu..

“Tanba duodesimál só bele halo kada fulan de’it, hanesan mós ho saúde. Agora ita preokupa ho COVID 19, ita tenke iha kapasidade finanseira sufisiente hodi halo akizisaun ba sasán sira. Ha’u hanoin alterasaun ne’e importante,” nia dehan.

Ministru ne’e espera, reprezentante povu sira aselera lalais alterasaun ne’e tanba ne’e la’ós asuntu relevante ba polítika maibé ne’e ba vida nasaun tomak nian

“Segunda iha diskusaun iha plenária kona-ba pedidu karáter urjénsia ne’e, Prezidente Parlamentu baixa tiha ona ba Komisaun C katak 24 horas sei konklui sira-nia relatóriu no parser,” nia dehan.

Notísia Relevante: Semana Oin, PN Debate Proposta Alterasaun Lei Orsamentu no Jestaun Finanseira

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here