Landmark Plaza. Imajen/Nelson de Sousa

DILI, 19 marsu 2020 (TATOLI) – Sekretáriu Estadu Terras no Propriedade (SETP), Mário Ximenes, klarifika katak, rai Landmark Plaza, sai privadu tanba komprova ho dokumentu rua, hanesan estatutu rai no estatutu sidadania.

Notísia Relevante : MJ Entrega Rai Landmark ba Na’in

Nia dehan,  desizaun Ministru Justisa Manuel Cárceres, foin lalais ne’e, hasai ona notifikasaun hosi Ministériu Justisa hodi entrega rai Landmark ba nia-nain (ema privadu) tanba komprova ho estatutu rai no estatutu sidadania.

Nia esplika, estatutu rai ho prova dokumentu ne’ebé mak iha liuhosi sertifikadu tempu Indonézia, posse, haree mós ho situasaun pasadu ninian. Nune’e mós estatutu sidadania katak ema-ne’e timoroan duni.

“Ho dokumentu komprovativu sira ne’e, nain ba rai refere mai rekere fila-fali tinan barak ona. Ho situasaun-sira ne’e haree prienxe kritériu tuir lei mak Ministru Manuel Cárceres deside atribui hikas rai ne’e ba nia-nain privadu,” hateten Sekretáriu Estadu Mário Ximenes, hodi responde Ajénsia Tatoli, ohin, iha nia kna’ar fatin, Colmera, Dili.

Iha tinan 2017 iha mandatu IV Governu Konstitusionál liuhosi Ministra Justisa Lucia Lobato, halo kontratu arrendamentu ho Kompañia Landmark hodi halo investimentu iha rai refere, nune’e kompañia iha devér selu arrendamentu ba estadu tuir kontratu ne’ebé iha.

“Agora Estadu la hola-parte ona iha rai ne’e. Tanba ne’e, depende  ba negosiasaun rai nia-nain ho kompañia Landmark,” hateten Mário Ximenes.

Sekretáriu Estadu Mário Ximenes esplika, tuir lei artigu 15 númeru 1/2003 ba rai abandona, estadu só administra provizóriu, tanba ne’e, bainhira rai abandona estadu halo administra hodi hein nia prosesu kuandu nain mai halo fali dokumentu komprovativu hodi indika prienxe kritéria tuir lei, sei atribui hikas fila-fali.

Nia mós rekoñese, antes ne’e, rai Landmark abandonadu, ho nune’e, estadu selebra akordu arrendamentu ho ema seluk.

Hatán kona-ba kompañia Landmark Plaza daudaun ne’e sei lori prosesu ba tribunal, Sekretáriu Estadu
Mário Ximenes, lia-tun dehan, ida ne’e desizaun administrativu, kualkér sidadaun iha direitu bele rekorre ba tribunal no fiar katak, desizaun  ikus, tribunal nian mak sei anula.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here