Embaixadór Alberto Preokupa Ho Prezensa Musulmanu TL iha Konferénsia Ijtima

DILI, 19 marsu 2020 (TATOLI)–Embaixadór Timor-Leste ba Repúblika Indonézia (RI), Alberto X.P. Carlos, preokupa ho prezensa reprezentante Musulmanu Timor-Leste nian hamutuk na’in-24 iha konferénsia internasionál Ijtima 2020 Zona Ázia iha sidade Gowa, Sulawesi du Súl, Indonézia.

Notísia Relevante : Relasiona ho Coronavirus, Embaixada TL iha Jakarta Alerta ba Timoroan Labele Pániku

Preokupasaun Embaixadór Alberto X.P. Carlos nian la’ós tanba eventu relijiozu ne’e, maibé preokupa ho pandemia Coronavirus (COVID-19) ne’ebé oras ne’e da’et ho lalais no makaas tebes iha Indonézia.

Liuhosi mensajen WhatsApp, ohin, ba Agência Tatoli, Embaixadór Alberto X.P. Carlos, hateten, nia mós “hakfodak” derrepente simu informasaun no haree notísia katak Timor-Leste nia reprezentante Musulmanu hamutuk na’in-24 mós to’o ona iha Gowa-Sulawesi du Súl hodi partisipa eventu internasionál ne’ebé hala’o iha loron 19 to’o loron 22 marsu 2020.

Iha Indonézia rasik liuhosi sira-nia Prezidente Joko Widodo (Jokowi) halo Estadu Alerta Emerjénsia  hodi ‘bandu’ ema halo atividade konsentradu no autoriza atu indonéziu-sira hala’o servisu de’it iha uma  no eskola-sira taka hodi estuda de’it iha uma.  Basá, pandemia COVID-19 lalais tebes afeta ba ema iha Indonézia.

Liuhosi publikasaun órgaun komunikasaun sosiál Indonézia nian sita  portavóz Governu Indonézia nian ba asuntu Prevensaun COVID-19, Achmad Yurianto, katak, to’o loron 17 marsu 2020, tuku 15:45 Oras Indonézia, identifika ona ema na’in-172 iha territóriu Indonézia mak pozitivu COVID-19.

“Iha situasaun pandemia COVID-19 ne’ebé da’et lalais hosi ema ba ema iha Indonézia no iha rai-seluk, maka ita-sira ba partisipa atividade iha estranjeiru ne’ebé  envolve ema-barak bele kauza perigu ba ita bainhira sira fila bá ita-nia rain,” afirma Embaixadór Alberto X.P. Carlos.

Nia sujere atu Governu Timor-Leste liuhosi Ministériu Saúde no Ministériu Negósiu Estranjeiru  atu identifika ema-hirak rezidente iha Dili, Timor-Leste mai vizita Indonézia no partisipa iha konferénsia internasionál Ijtima 2020 Zona Ázia iha Gowa, di’akliu kuarentena-sira iha Bali durante loron 14 para evita risku COVID-19 tama Timor-Leste.

“Ha’u informa ona situasaun ne’e ba Ministériu Negósiu Estranjeiru no Kooperasaun (MNEK) Timor-Leste,” hateten Embaixadór Alberto Carlos.

Tenke Kuarentena

Liuhosi komunikasaun mensajen Facebook, Ministru Negósiu Estranjeiru no Kooperasaun, Dionísio da Costa  Babo Soares, rekoñese katak, nia-parte simu ona informasaun sobre partisipasaun reprezentante Musulmanu Timor-Leste nian na’in 24 iha konferénsia internasionál Ijtima 2020 Zona Ázia iha Gowa.

Ministru Dionísio Babo, husu ba lider ka responsavel  Musulmanu fó naran ema-sira ne’e hotu mai autoridade Servisu Migrasaun ho Ministériu Saúde.

“Só timoroan de’it maka bele fila tenke tama Kuarentena. Hirak ne’ebé la’ós timoroan enkoraja lalika filamai,” hateten Ministru Dionísio Babo.

Ministru Dionísio mós komunika ona ba Polísia  Nasional Timor-Leste (PNTL) atu haree no kontinua enkoraja atu sira koopera hodi bele halo tuir Rezolusaun Governu Timor-Leste nian ne’ebé fó-sai, horisehik.

Iha konferénsia internasionál Ijtima Zona Ázia 2020 ne’e, aleinde partisipa sidadaun Musulmanu husi provínsia-sira Indonézia  nian, marka prezensa mós reprezentante Musulmanu husi nasaun estranjeiru hanesan Pakistaun nia ema na’in-58, Índia (83), Tailándia (176), Brunei ( na’in ida),  Timor-Leste (24), Arabia (na’in-ualu), Bangladesh (24) ho Filipina na’in-rua.

Musulmanu Indonézia nian rasik ne’ebé rejistadu partisipa iha konferénsia internasionál ne’e hamutuk ema na’in-8.283.

Jornalista : Eugénio Pereira

Editór       : Francisco Simões