Logotipu TDD. Imajen Tatoli/Dok.

DILI, 19 marsu 2020 (TATOLI) – Tribunál Distritál Dili (TDD) liuhosi Juis koletivu Ivan Suritay, Evangelino Belo, Yudi Pamukas, deside hodi adia-hikas julgamentu ba kazu kontrabandu no descaminho (penyimpangan) ne’ebé deskonfia komete hosi arguidu MY nu’udar emprezáriu internasionál ida.

Tuir loloos, ohin, TDD hala’o kontinuasaun julgamentu (tesi-lia) ba kazu ne’ebé aprezenta hosi Prokuradór Jacinto Babo ne’ebé reprezenta Ministériu Públiku (MP), maibé arguidu-nia defeza  seidauk iha kontestasaun hasoru akuzasaun MP nian. Nune’e, Prokuradór Jacinto Babo husu tribunál atu adia fali-fali sorumutuk tesi-lia (julgamentu) ne’e ba loron seluk.

Rona-tiha rekomendasaun MP nian ne’e, Juis koletivu deside adia fila-fali julgamentu ne’e ba iha loron 14 maiu 2020.

Tuir faktu ne’ebé arrola hosi Ministériu Públiku katak, arguidu nu’udar na’in ba sentru supermerkadu ida ne’ebé lokaliza iha Dili. Nune’e,  iha fevereiru 2018, arguidu importa sasán merkadoria balun hosi Darwin-Austrália mai Timor-Leste.

Bainhira sasán to’o iha Portu Dili, arguidu uza ajénsia ka broker ho naran Fatul Ajénsia Unipesoal, Lda, hodi trata dokumentu-sira kona-ba Custom Clearence nian.

Hafoin trata tiha dokumentu ne’e, autoridade Alfándega halo kedas inspesaun ba kontentór ho númeru CMAU 1748856 ho nia bill of lading N.S00046 deteta katak, sasán-sira ne’ebé tula iha kontentór nia-laran ne’e balun la eziste iha invoice Packing list nian hodi dezvia atu la selu taxa ba estadu.

Ho nune’e, Alfándega halo  apreensaun ba sasán merkadoria-sira iha lista invoice nian ho nia deskrisaun hanesan Melbourne Biter Serveija kaixa rua (2) , kuantidade litru 18, Victoria Biter kaixa ida, kuantidade litru sia, James Boagis Premium kaixa tolu, kuantidade litru 27, Pure blond kaixa rua, kuantidade litru 17,4 , Tooheys Brother kaixa ida, kuantidade litru 9, Premiun light kaixa tolu, kuantidade litru 27, Gunness Draught kaixa neen, kuantidade litru 63,40, Carlton draught kaixa tolu, kuantidade litru 27, Coopers Pale Ale kaixa 24, kuantidade litru 216.

Arguidu prátika ho livre intensionál no konsiente hatene hela katak nia-hahalok hanesan ne’e labele no kontrabandu. Ho nune’e, Ministériu Públiku akuza arguidu ho krime kontrabandu ne’ebé previstu iha artigu 316, númeru 1 no artigu 317 kona-ba descaminho, númeru 1, kódigu penál Timor-Leste.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here