Komandante Jerál PNTL, Komisáriu Faustino da Costa no komandante-sira hasai foto hamutuk ho ofisiál PNTL na’in 14 ne’ebé partisipa debate públiku iha Kuartél Jerál PNTL. Imajen/Eugénio Pereira

DILI, 19 marsu 2020 (TATOLI)- Komandu Polísia Nasionál Timor-Leste, ohin, realiza debate públiku ho tema “Matenek no Badaen Nodi Tane Aas Instituisaun PNTL”.

Notísia Relevante : PNTL Selebra Aniversáriu Ba Dala-XX Ho Jogu Voleiból Amizade

Debate públiku ne’e nu’udar ajenda ida hosi programa ne’ebé pertense ba komemorasaun aniversáriu PNTL ba dala-XX (27 Marsu 2000- 27 Marsu 2020).

Konkorrente-sira ne’ebé partisipa iha debate públiku mai hosi ofisiál membru PNTL  na’in  14 maka hanesan, Inspetór Alexandrino “Samurai” hosi Unidade Espesiál Polísia (UEP), Inspetór Aniceto da Silva hosi Unidade Polísia Marítima (UPM), Inspetór Xefe Roberto do Santos hosi Unidade Servisu Migrasaun, Inspetór Fortunato Fausto Guterres hosi Munisípiu Liquiça, Inspetór Asistente Mário Esposto da Silva hosi Ermera, Inspetór Xefe Bernardo Freitas husi RAEOA, Inspetór Xefe Mário da Costa hosi Servisu Intelijénsia Polísia (SIP),  Inspetór Domingos Gama hosi Unidade Tránzitu Dili, Inspetór Alberto de Almeida hosi Unidade Polísia Fronteira (UPF),  Inspetór Asistente Cristian Dias hosi CFP, Inspetór Alcino da Cruz hosi Manufahi, Inspetór Mauclau G. hosi Baucau, Inspetór António Soares hosi Aileu,  ho Inspetór Hermenegildo dos Santos hosi Lautem.

Komandante Jerál PNTL, Komisáriu Faustino da Costa, afirma, debate ne’e bele halibur idea matenek hosi konkorrente-sira nia hanoin, oinsá lori Instituisaun PNTL atu servisu ba estadu no povu ho profisionál liután tuir mandamentu Konstituisaun RDTL.

Debate ne’e atu promove mós kapasidade membru-sira nian sai lideransa no komandante di’ak hodi prepara sai lider ba futuru Instituisaun PNTL.

“Atividade ne’e nu’udar mós parte ida atu membru-sira hatene interpreta estratéjiku polítika komandu nian ba dezenvolvimentu Instituisaun PNTL,” afirma Komisáriu Faustino iha nia diskursu  abertura serimónia  debate públiku ne’e.

Faustino lia-tutan dehan, tema “Matenek no Badaen Nodi Tane Aas Instituisaun PNTL” nu’udar baze no fundamentu no importante ba membru-sira atu fahe matenek ne’ebé riku  para kontribui hadi’a instituisaun PNTL sai profisionál.

“Ita boot-sira nia partisipasaun atu bele dezenvolve no suporta komandu haree ba problema saida maka ita enfrenta no  frakeza saida mak ita iha no karik hateke ba oin PNTL eziste ona tinan 20, saida maka ita presiza atu hadi’a di’ak liután hodi kumprimenta misaun PNTL nian,” Faustino da Costa hateten.

Komandante ne’e husu ba konkorrente-sira uza tempu loron rua atu debate ho profisionál kona-ba asuntu hothotu ne’ebé liga ba PNTL nia servisu hodi promove sira nia kapasidade lideransa.

Iha fatin hanesan, Prezidente Komisaun Organizadora ba Aniversáriu PNTL ba dala-XX, Superintendente Xefe, Pedro Belo dehan konkorrente-sira ne’ebé tuir diskursu públiku ne’e rejista ema na’in 26, maibé iha finál membru na’in 14 maka partisipa.

Iha ajenda debate públiku ne’e, ekipa juri-sira fó oportunidade ba membru-sira hili rasik tema liga asuntu jerál ne’ebé iha ligasaun ho knaar PNTL nian.

Ba membru-sira ne’ebé debate ho kategoria di’ak, ekipa juri Komandu PNTL sei hili hodi entrega taxa no osan nu’udar parte ida atu promove membru sira.

Aniversáriu PNTL ba dala-XX ne’e prienxe ho atividade desportiva voleiból, dada-tali entre PNTL hasoru Membru Konsellu Polisiamentu Komunitáriu (KPK) hosi suku 10, Unidade Membru PNTL inklui Polisia Militár F-FDTL ne’ebé sei hala’o iha loron 24 too 25 Marsu 2020.

Komandu mós sei halo promosaun diviza ba ofisiál PNTL ne’ebé hetan prestasaun servisu di’ak tuir avaliasaun dezempeñu komandu nian. Serimónia promosaun diviza ne’e sei ofisializa iha loron 27 Marsu 2020.

Jornalista : Eugénio Pereira

Editór       : Francisco Simões

PUBLISIDADE HUSI MTCIiklan

1 KOMENTÁRIU

  1. Parabens ba instituisaun PNTL nb promove debate publiku, hein ktk ho debate refere bele halao lei no ordem diak liu iha tempo oin mai, bom susesu

HAKEREK NO HATÁN

Please enter your comment!
Please enter your name here