Imajen Espesiál

DILI, 19 marsu 2020 (TATOLI)–Sekretáriu Jerál Fretilin, Marí Bin Amude Alkatiri ho nia estrutura Comité Central Fretilin tomak ohin, presta omenajén ikus ba saudozu Victór Da Costa “Sugiono” akomapañadu ho Ino Partidu Fretilin “Foho Ramelau” ne’ebé Saudozu Francisco Borja da Costa hakerek.

Sekretáriu Jerál Fretilin, Marí Bin Amude Alkatiri hateten, bainhira moris saudozu sei moris, hamutuk ba luta ida no bainhira husik rai ida-ne’e, oan sira sei buras ba nafatin.

“Bainhira ita sei moris, ita hamutuk ba luta ida. Bainhira husi rai ida-ne’e, ita-nia oan sei buras nafatin. Iita bele! Tanba, hun ne’e boot ba beibeik no sanak ne’e naruk ba beibeik. Hateke ba oan no be’oan sira. Ha’u hakarak hatene katak kamarada Victór da Costa, nia transmite primeiru ba família no tuir mai ba nia kuadrus no militantes tomak,” dehan Sekretáriu Jerál Fretilin, Marí Bin Amude Alkatiri, ba jornalsita sira iha sede CCF, Comoro, Dili, kinta ne’e.

Tanba ne’e, Sekretáriu Jerál hakarak lori Fretilin nia naran hodi hato’o obrigadu ba militante ida no kuadru superior ida, kamarada Victor da Costa “Sugiono” ne’ebé mak fó ona nia kontribuisaun boot atu konsolida objetivu pátria ba povu tomak.

“Ha’u hakarak lori Fretilin nia naran hodi fó obrigadu barak ba militante ida no kuadru superiór ida, kamarada Victor da Costa “Sugiono” ne’ebé mak fó ona nia kontribuisaun boot atu konsolida objetivu de pátria ba ita-nia povu tomak”, nia dehan.

Marí hatete, kamarada Victór hatene saida mak luta no saida mak harii rai doben ida-ne’e. Kamarada Victor mós hatene saida mak signifikadu maubere tanba lisaun sira-ne’e mak nia husik hela ba jerasun foun sira atu hatutan.

“Ha’u hatene, katak loron ohin loron triste ba ita hotu liuliu ba família sira, tanba situsaun ida agora akontese dezafiu bara-barak. Hanesan dezafiu polítiku no moras oin-oin ne’ebé ema hotu tauk no moras ne’e hada’et ba ema hotu,” nia esplika.

Nia dehan, bainhira iha luta ida sempre mosu kontradisaun maibé importante liu mak halo oinsa bele hakat liu kontradisaun ida-ne’e, para hametin liután unidade iha rai ida-ne’e.

“Bainhira prosesu iha luta tomak maibé sempre iha kontradisaun. Hakat liu tiha kontradisaun, fila-fali ba ita-nia uma knua ida-ne’e hodi hametin unidade atu serbi di’ak liután partidu no nasaun ida-ne’e,” nia esplika.

Jornalista : Osória Marques

Editór      : Cancio Ximenes

 

HAKEREK NO HATÁN

Please enter your comment!
Please enter your name here