DILI, 19 marsu 2020 (TATOLI)- Liña distribuisaun enerjia eletrisidade sirkuitu derrepente, ohin, purvolta tuku 14:00 Otl, rezulta ahi-han moos sasán printing iha Armazén Kompañia Internasionál Brother At Your Side iha Suku Kampu Alor, Postu Administrativu Vera Krús, Munisípiu Dili.
Akontesimentu ne’e la rezulta traballadór ruma mate no kanek, maibé ekipamentu hanesan, Mákina Prodús Banner boot ida hetan estragus, inklui sasán roll up banner, X-Banner, mákina prodús kamiza, komputadór lima (5) inklui sura-tahan no materiál importante sira-seluk ahi-han hodi fó prejuizu ba kompañia lakon osan barak.
Hafoin akontesimentu ne’e, iha minutu balun nia-laran , ekipa Bombeiru Munisípiu Dili mós too kedas hodi halo intervensaun, rega-mate ahi no ajuda salva lalais ekipamentu balun.
Tuir sasin nu’udar mós traballadór iha Kompañia Internasionál hosi Indonézia, Brother At Your Side, Romeo de Jesus Amaral, haktuir, katak molok ahi-han, mosu sirkuitu iha liña eletrisidade hodi halo travo rebenta makas iha armazén-laran.
“Ami hala’o hela servisu depois ahi-mate. Derrepente, ahi lakan-fali maka mosu sirkuitu iha armazén kotuk halo travo rebenta no tarutu makaas. Ami mós hakfodak sai ba haree ahi-han ona, entaun ami halai salva-aan de’it ona,” informa Romeo hodi responde Ajénsia Tatoli.
Diretór Kompañia Brother At Your Side, Deny Kristianti, daudaun ne’e, hala’o hela vizita ba Indonézia. Mezmu nune’e, hosi dook nia simu informasaun trájiku ne’e hodi fó korajen ba traballadór-sira atu labele pániku hodi salva-aan imediatamente.
“Patraun ba hela Indonézia. Nia rona ona informasaun ne’e, maibé nia dehan importante maka ami traballadór nia salvasaun,” haktuir Romeo.
Kompañia ne’e foin maka loke hala’o nia atividade iha área printing nian, ne’ebé absorve traballadór Timoroan na’in neen (6) ho traballadór Indonézia balun.
Tuir observasaun Ajénsia Tatoli nian iha terrenu nota katak, hafoin akontesimentu ne’e, Ofisiál Polísia Suku (OPS) Kampu Alor, Lino da Silva no autoridade suku inklui Konsellu Polisiamentu Komunitáriu (KPK) mós hamutuk ho traballadór sira no ekipa Bombeiru ajuda evakua sasán balun ne’ebé ahi seidauk-han.
Jornalista : Eugénio Pereira
Editór : Francisco Simões
