Primeiru-Ministru, Taur Matan Ruak, bainhira rona opiniaun husi médiku senior sira iha Palásiu Governu, tersa (17/03). Imajen/Mídia GPM

DILI, 17 marsu 2020 (TATOLI) – Primeiru-Ministru (PM), Taur Matan Ruak bolu médiku senior na’in tolu hodi rona opiniaun relasiona ho Coronavírus ka COVID-19, ne’ebé hanesan kestaun globál ona.

Médiku Senior na’in-tolu ne’e mak hanesan eis Primeiru-Ministru, Rui Maria de Araújo, eis Ministru Saúde, Sérgio Lobo no eis Ministru Saúde, Nelson Martins.

“Ohin ha’u reuniaun ho ita-nia médiku sira atu rona sira-nia opiniaun, krítiku, no apresiasaun ba esforsu sira ne’ebé Governu liuhosi Ministériu Saúde durante ne’e halo no enfrenta moras ida ne’ebé mai. Sira fó ideia di’ak no balun krítiku no presiza hadi’a. Haree ba opiniaun balun di’ak no ita tenke aproveita”, dehan PM Taur hafoin entrega simbolikamente ajudu umanitáriu ba komunidade afetadu dezastre naturál iha Suku Santa Crus, tersa ne’e.

Sorin seluk, Médiku Senior, Sérgio Lobo, relata soru-mutu ho Xefe Governu tanba hakarak rona opiniaun kona-ba servisu iha área saúde.

“Primeiru-Ministru bolu ami hakarak rona opiniaun uitoan hosi médiku senior sira kona-ba ita-nia sidadaun hasoru Coronavírus. Tanba ne’e ohin opiniaun sira-ne’e barak liu opiniaun téknika oinsá prepara ita-nia komunidade no ita-nia nasaun atu hasoru situasaun ida-ne’e”, nia subliña.

Tuir Sérgio katak, maski seidauk iha rejista kazu Coronavírus iha Timor-Leste, maibé Governu no komunidade tenke preparadu atu hasoru situasaun ne’e.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here