DILI, 19 marsu 2020 (TATOLI)-Servisu Saúde Munisípiu Dili, hahú iha loron domingo (15/03/2020) liubá koloka ona pesoál sira hodi tama-sai uma komunidade ne’ebé afetadu ona inundasaun iha área Cristo Rei, Na’in Feto, no Hera, Postu Administrativu Metinaro hodi fó tratamentu saúde.
Diretóra Saúde Munisípiu Dili, Agustinha Segurado informa nia parte forma ekipa movél hamutuk 16, maibé 13 maka dadaun ne’e tuun diretamenti iha terrenu hodi fó asisténsia ba komunidade, enkuantu tolu seluk konsentra iha Saúde Munisípiu Dili.
“Objetivu ida atu fó asisténsia ba ita-nia povu sira ne’ebé mak labele sai hosi sira-nia fatin ita tenke lori saúde ne’e besik bá sira, karik iha moras ruma bele halo kedan atendimentu,”katak nia ba jornalista sira, iha Bidau Mota Klaran, kuarta (18/03/2020).
Ekipa sia koloka bá iha área Cristo Rei, ekipa rua bá iha Postu Administrativu Na’in Feto, ekipa rua seluk iha área Hera.
Tanba tuir dadus ne’ebé relata ona hosi ekipa movél sira iha terrenu nota katak númeru pasiente Infesaun viás respiratóriu ka ISPA, diaréa no Isin katar aumenta maka’as.
“Hosi inundasaun ne’e, halo populasaun barak iha Dili laran afeta moras Ispa, isin katar no diaréia ida ne’e, informasaun ne’e relata hosi sira ne’ebé halo tratamentu mak esplika mai ha’u, entaun ami Saúde Munisípiu Dili esforsu nafatin hodi fó asisténsia ba komunidade sira ne’e,”nia haktuir.
Nia realsa, aproveita atividade tratamentu saúde ba komunidade ne’e, Saúde Munisípiu Dili distribui mós muskiteru ba komunidade afetadu inundasaun ne’ebé akontese iha sesta (13/03/2020).
Jornalista : Hortencio Sanchez
Editór : Agapito dos Santos
