Ofisiais hosi MS teste hela temperatura ba ema-sira ne'ebé tama-sai TL liuhosi aeroportu no portu. Imajen/Antonio Goncalves

DILI, 18 marsu 2020 (TATOLI)–Ministru Defeza no Ministru Interiór Interinu, Filomeno da Paixão de Jesus, husu ba ekipa Diresaun Jerál Servisu Migrasaun iha postu integradu fronteira hotu hodi koopera ho ekipa Ministériu Saúde halo kontrolu makaas ba movimentu sidadaun estranjeira para evita pandemia COVID-19 da’et mai Timor-Leste.

Notísia Relevante : Governu Apela ba Estudante iha Rai-li’ur Prevene An hosi COVID-19

Ministru Defeza no Ministru Interiór Interinu, Filomeno da Paixão de Jesus. Imajen/ Egas Cristovao

“Ita nia Migrasaun servisu hela hodi halo kontrolu, maibé ita tenke fó mós protesaun saúde ba sira,” afirma Ministru Filomeno Paixão, ohin, hodi responde Agência Tatoli iha Palásiu Governu, Dili.

Ministru Filomeno Paixão hatutan, Servisu Migrasaun mós sei halo preparasaun atu kontrolu makaas movimentu sidadaun estranjeira ne’ebé halo viajen maihusi Repúblika Populár Xina, Repúblika Koreia, Itália no Repúblika Izlámika Iraun.

Tuir dadus ne’ebé Agência Tatoli asesu hosi Portál Governu Timor-Leste katak, iha janeiru 2020, Organizasaun Mundiál Saúde (OMS) kualifika pandemia COVID-19 nu’udar Estadu emerjénsia saúde internasionál.

Tuir kontajen OMS nian, to’o agora (iha nia relatóriu loron 9 fulan-marsu) kazu COVID-19 ne’ebé konfirma ona hamutuk 109.577 no hosi númeru ne’e, kazu hamutuk 80.904 mosu iha Xina.

Notísia Relevante : KM Aprova Rezolusaun Bandu Sidadaun Estranjeira Tama Timor-Leste

Kazu COVID-19 mosu ona iha nasaun 104, ne’ebé hamate ona ema hamutuk 3.809 (3.123 iha Xina no 686 iha nasaun sira seluk).

Sinál no síntoma COVID-19 nian maka hanesan isin-manas, me’ar no susar atu dada-iis. Nune’e, ba ema-sira ne’ebé iha síntoma ne’e tenke komunika lalais ho Ministériu Saúde ou sentru saúde  atubele hetan tratamentu urjente.

Notísia Relevante : Governu Husu Komunidade Labele Pániku ho Pandemia COVID-19

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here