Diretór HAK, Manuel Monteiro Fernandes. Imajen/Dok

DILI, 18 marsu 2020 (TATOLI) – Asosiasaun HAK no Rede Plataforma Nasional Bee-Moos, Saneamentu ho Ijiene Timor-Leste (PN-Besi TL), ohin, ofisializa públika sira-nia relatóriu peskiza ba asesu bee-moos iha Munisípiu ualu (8) hatudu katak, populasaun uma-kain 3.466 asesu bee hosi mota no konsumu bee-mota.

Munisípiu ualu ne’ebé sai alvu levantamentu dadus no peskiza mak hanesan Munisípiu Aileu, Ainaro, Baucau, Viqueque, Dili, Ermera, Liquiça ho Manufahi.

Liuhosi konferénsia imprensa iha Edifísiu Asosiasaun HAK, Faról, Dili, Diretór Asosiasaun HAK Manuel Monteiro, informa, monitorizasaun ne’e hatudu katak, dezenvolvimentu setór bee-moos iha munisípiu hirak ne’e hosi total suku 57, aldeia 349, ho total uma-kain 3.466 konsumu bee la ijiene no bele prejudika ba sira-nia saúde.

Relatóriu HAK nian ne’e mós identifika uma-kain 4.643 hosi munisípiu ualu ne’e asesu bee hosi bee-matan, uma-kain 3.447 asesu bee hosi bee-posu (uza sanyo) no uma-kain 34.391 asesu bee-moos hosi fornesimentu kanalizasaun Servisu Agua no Saneamentu (SAS).

Iha loron 22 marsu, tinan-tinan, nu’udar loron komemorasaun mundiál bee. Tanba ne’e, Diretór Asosiasaun HAK Manuel Monteiro, husu ba governu atu fó importánsia ba bee tanba bee mak abut ba ema nia-moris.

“Bee ho saneamentu ijiéniku hanesan direitu fundamentu hatuur metin iha artigu 29 Konstituisaun RDTL. Estadu respeita vida umana, bee hanesan ita-nia abut ba moris no bainhira bee laiha ba povu hatudu katak kompromisu estadu nian sei laiha folin,” afirma Manuel Monteiro.

Biban ne’e, Januário Amaral nu’udar peskizadór HAK  hateten, Timor-Leste kompleta ona restaurasaun independénsia ba dala-18 no hatuur ona Planu Estratéjiku Dezenvolvimentu Nasionál (PEDN) 2011-2030 hodi hatán ba povu nia moris-di’ak no prósperu liu-liu iha asuntu sosiál hanesan bee-moos.

Nia dehan, objetivu dezenvolvimentu sustentável ne’ebé hakerek ona iha PEDN sei kontribui ema milaun liu-650 iha mundu inklui Timor-Leste maka daudaun ne’e seidauk asesu bee-moos ne’ebé seguru.

Kobertura nasionál ba bee tuir dadus JMP 2019 hatudu katak, purvolta porsentu 78 ho kategoria urbanu (98%) no remotas (70%) ne’e asesu báziku liu, númeru populasaun ne’ebé aumenta kada tinan sei fó impaktu ba asesu bee ne’ebé la adekuadu, asesivel no seguru iha komunidade.

“Kondisaun ida ne’e sei afeta ba kualidade moris ita-ema no mós afeta ba dezenvolvimentu nasaun hosi aspetu hotu,” Januário Amaral hateten.

Januário Amaral rekomenda ba governu liuhosi Ministériu Obras Públika (MOP) atu konsidera bee, saneamentu no ijiéniku iha aloka orsamentu jerál estadu nian fó porsaun boot liu iha bee-moos kompara ho setór seluk.

Husu ba Diresaun Nasional Agua no Saneamentu atu orienta tékniku-sira iha postu administrativu no munisípiu hodi halo akompañamentu ba grupu maneja fasilidade no presiza atu regula didi’ak lei númeru 4/2004 hodi asegura jestaun bee iha area remota no urbana.

Januário Amaral mós husu lider komunitária hotu atu kria enkontru komunitária hodi kuida no próteze ba patrimóniu estadu nian ne’ebé instala ona iha aldeia, suku, postu no munisípiu.

“Husu ba komunidade hotu atu uza bee ho kuidadu hodi asegura asesu bee ba ema hotu no konserva bee-matan hodi asegura sustentabilidade,” Januário tenik.

Jornalista : Nelson de Sousa

Editór      : Francisco Simões

HAKEREK NO HATÁN

Please enter your comment!
Please enter your name here