Vise-Ministra ba Kuidadu Saúde Primáriu, Élia António de Araújo dos Reis Amaral. Imajen/Egas Cristovão

DILI, 18 marsu 2020 (TATOLI)–Prezidente Repúblika (PR), Francisco Guterres “Lú Olo”, Kontinua fó apoiu másimu ba ekipa interministeriál ne’ebé kontinua serbisu ba prevensaun Coronavirus (COVID-19) iha rai-laran no fronteira sira. 

“Prezidente Repúblika kontinua fó apoiu másimu ba situasaun ida-ne’e, atu nune’e bele haforsa ita hotu hadook an no kombate hamutuk moras Coronavirus,” dehan Ministra Saúde Interina, Elia A.A dos Reis Amaral, ba jornalista sira hafoin atualiza preparasaun prevensaun Coronavirus ba Prezidente Repúblika, iha Palásiu Prezidente Nicolau Lobato, Bairru Pité, Dili, kuarta ne’e.

Nia hateten, objetivu husi enkontru ho Prezidente Repúblika atu reforsa koordenasaun no kontrolu transmisaun Coronavirus iha rai-laran no mós fronteira sira.

“Ohin ami mai ho ekipa hosi Ministériu Saúde no mós hanesan Prezidente Komisaun interministerial kombate Coronavirus, ho mós ekipa husi Cruz Vermelha Timor Leste (CVTL), reprezentante Nasaun Unida iha Timor-Leste, reprezentante Organizasaun Mundiál Saúde iha Timor-Leste nian,” Ministra Saúde interina ne’e hateten.

Nia informa liután, antes ne’e iha sesaun plenária Parlamentu Nasionál, Ministra interina hato’o ona kona-ba serbisu sira ne’ebé mak Ministériu Saúde halo tiha ona no to’o ohin loron kazu konfirmadu laiha.

“Ami Sei hakaas an atu haforsa liután vizilánsia ho rigorozu liután iha ita-nia porta (odamatan) entrada sira,” nia subliña.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here