Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 17 marsu 2020 (TATOLI)—Prezidente Parlamentu Nasionál, Arão Noé de Jesus da Costa Amaral, hateten to’o agora Timor-Leste seidauk iha lei ida hodi regula no fó lisensa ba ema halo uma no edifísiu públiku sira.

“Ita agora laiha lei ida oinsá fó lisensa ba halo konstrusaun edifísiu no uma sira. Ida-ne’e mak problema boot ba ita oinsá bele regulariza, katak ema atu halo uma karik, nia tenke husu lisensa nune’e Obra Públika bele haree uma ninia pozisaun. Uma ne’e keta okupa fatin bee-dalan nian”, Arão Noé ko’alia kestaun ne’e hafoin organiza funsionáriu Parlamentu Nasionál, hala’o atividade limpeza jerál iha área tasi-ibun, Suku Bidau Santa Ana, Postu Administrativu Cristo Rei, tersa ne’e.

Prezidente Parlamentu Nasionál fó-sai katak, tanba seidauk iha lei kontrola entaun ema ida-idak halo uma tuir nia hakarak.

“Foin lalais ha’u haree uma ida, bee-dalan tun hosi foho mai taka metin tiha entaun bee ne’ebé atu sai mai esgotu ne’e labele mai”, nia dehan.

Prezidente Parlamentu Nasionál argumenta, atu halo lei ne’e tenke hamosu inisiativa hosi Governu liuhosi Ministériu Obra Públika (MOP).

Ho lei laiha ne’e, Arão Noé husu ba populasaun labele halo uma besik husik bee-dalan tanba forsa bee nian laiha ema ida atu trava bainhira ho volume boot.

Tuir nia, problema seluk mak lixu, tanba bainhira udan-boot tasi ibun sira hetan mak plástiku no ákua mamuk.

“Depois populasaun sira tau lixu iha saku soe ba mota-laran, entaun udan mai mota lori ba intupidu no rezultadu bee sa’e. Ne’e konsekuénsia hosi sasán sira-ne’e hotu”, Arão informa.

Prezidente Parlamentu Nasionál husu kolaborasaun tomak nian no labele ezije de’it ba Estadu tanba sidadaun la kontribui, Governu labele halo buat ida.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here