Prezidente Parlamentu Nasionál, Arão Noe de Jesus da Costa Amaral. Imajen /Egas Cristóvão

DILI, 17 marsu 2020 (TATOLI)—Prezidente Parlamentu Nasionál, Arão Noé de Jesus da Costa Amaral, fó hanoin katak presiza hamoos esgotu sira iha sidade Dili ho rutina, nune’e bainhira udan, bee bele suli tuir dalan.

“Ha’u haree impaktu inundasaun ne’e tanba esgotu sira ita la hamoos ho rutina tanba barakliu sai hosi mota sira hodi sobu populasaun sira-nia uma. Tanba ne’e mak ohin ami kontribui uitoan mai hamoos sidade ein-relasaun ba akontesimentu inundasaun iha sesta liubá”, nia dehan iha Ponte BJ Habibie, Suku Bidau Santa Ana, Postu Administrativu Cristo Rei, Munisípiu Dili, tersa ne’e.

Prezidente Parlamentu Nasionál ne’e mós iha sesta liubá hala’o observasaun direta iha terrenu, nota problema la’ós tanba udan maka’as, problema iha sedimentasaun iha mota sira-ne’e nakonu tiha ona, hanesan ponte Maufelu falta de’it séntimu balun atu rabat ponte ne’e tanba ne’e mak bee intupidu nia sa’e mai estrada no sulin mai kraik sira-ne’e hotu halo tahu nakonu.

Nune’e mós ponte My Friend nian sedimentasaun nakonu halo intupidu iha ne’ebá, bee suli tun ba hodi sobu eskola Portugeza nian. Hanesan mós ida Palásiu Prezidente ne’e sedimentasaun ida tun hosi mota Maloa nian, rai-henek nakonu tiha ona okos entaun mota tun mai bee labele liu, intupidu no sa’e tama palásiu.

“Ne’e katak presiza normalizasaun mota sira-ne’e periodikamente. Tinan-tinan tenke suru rai-henek to’o kraik atu nune’e udan mai labele sa’e aas hanesan agora daudaun. Ne’e mak fó hanoin ba Governu liuhosi Ministériu Obra Públika, ohin bá-oin ne’e hasai tiha rai-henek iha mota-laran nune’e husik espasu livre, se udan karik bee halai tuir nia dalan. Agora fatin-rua Governu presiza rezolve maka tenke halo drenajen boot ida hosi Balide Rai-hún, ida-ne’e mak halo tun mai tama mós iha área Caicoli sira-ne’e hotu”, Prezidente Parlamentu Nasionál ne’e fó hanoin ba Governu.

“Be tun mai tanba esgostu laiha entaun intupidu iha estrada klaran no namkari tun mai populasaun nia uma. Ida mak Becora laiha bee-dalan ka esgostu ida ke di’ak hodi bele adsorve bee ne’ebé tun hosi foho-leten mai entaun ida-ne’e mak mai sobu Eskola 5 de Maio. Ha’u hanoin pontu grave ne’ebé deteta katak se solusiona sira-ne’e Dili sei normaliza fila-fali”, Arão hateten.

Arão Noé reprezenta Parlamentu hato’o sentida kondolénsia ba família ne’ebé sai vítima ba dezastre iha sesta liubá.

Relasiona ho inundasaun ne’e, Prezidente Parlamentu Nasionál, organiza funsionáriu Parlamentu hala’o limpeza jerál bazeia ba desizaun Governu nian hasai rezolusaun.

Tuir observasaun Agência TATOLI iha área ne’ebé funsionáriu Parlamentu Nasionál hala’o limpeza hanesan área tasi-ibun Suku Bibau Sant Ana, besik ponte BJ Habiebie, nota katak rai-henek nakonu iha esgostu ne’ebé liga ba ponte refere.

Funsionáriu Parlamentu Nasionál suru sai rai-henek iha esgostu ne’e hahú hosi tuku 10.00 to’o 12.45.

Entretantu, informasaun ne’ebé Agência TATOLI hetan hosi peskadór iha área refere, Vitál da Silva, informa área refere hetan inundasaun mai hosi mota Taibessi.

“Sorte mota Taibessi de’it. Se mota ida hosi Camea nian tun mai ne’e aat liu, tanba se momentu ne’e mak mota Camea mak boot tan lahatene loos, parese situasaun iha ami-nia ne’e sei sai oin seluk”, nia haktuir.

Limpeza jerál ne’e dirije diretamente hosi Prezidente Parlamentu Nasionál, Arão Noé de Jesus da Costa Amaral, Vise-Prezidente Parlamentu Nasionál, Maria Angelina Sarmento Lopez, Segundu Vise PN, Luís Roberto, deputadu sira no funsionáriu tomak Parlamentu nian inklui mós asesór internasionál balun.

Tuir planu, kuarta (18/03), Parlamentu Nasionál sei hala’o limpeza jerál iha área sira-ne’ebé afetadu ba inundasaun hanesan Becora, Taibessi no fatin seluk.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here