Ilustrasaun Coronavírus. Imajen/bncampinas.com

DILI, 18 marsu 2020 (TATOLI)–Ministra Saúde interina, Élia A. A dos Reis Amaral hateten, Prezidente Repúblika (PR), Francisco Guterres “Lú Olo”, mak iha kompeténsia atu dekreta Estadu Emerjénsia relasiona ho Coronavirus (COVID-19). 

“Estadu Emerjénsia relasiona ho Coronavirus (COVID-19) ne’e, kompeténsia Prezidente Repúblika nian. Ita hein, tempu badak Prezidente Repúblika sei ko’alia kona-ba asuntu ne’e,” dehan Ministra Saúde interina, Élia A. A dos Reis Amaral, ba jornalista sira hafoin atualiza preparasaun prevensaun Coronavirus ba Prezidente Repúblika, iha Palásiu Prezidente Nicolau Lobato, Bairru Pité, Dili, kuarta ne’e.

Antes ne’e, ezekutivu sira liuhosi soru-mutu Konsellu Ministru (KM) estraordinária, deside solisita Prezidente Repúblika (PR), Francisco Guterres ‘Lú Olo’, hodi dekreta Estadu Emerjénsia relasiona ho evolusaun no preokupasaun ba situasaun epidemiolójika ba kazu rejistadu husi Coronavírus ka COVID-19 iha eskala globál.

Tanba ne’e, situasaun ne’e ezije Governu aplika medida estraordinária ho karáter urjente atubele trava situasaun ne’e afeta ba rai-laran.

Antes ne’e mós, Ministru Reforma Lejizlativa no Asuntu Parlamentár, Fidelis Manuel Leite Magalhães hafoin reuniaun Ezekutivu iha Palásiu Governu hateten, liuhosi desizaun KM aprova no halo mós deliberasaun kona-ba medida imediata sira ne’ebé maka Governu sei foti no medida imediata balun ne’ebé sei hatuur iha rezolusaun balun, inklui iha proposta ba Estadu Emerjénsia ne’ebé sei hato’o ba Xefe Estadu.

Bainhira Xefe Estadu dekreta ona diploma ne’e maka ezekutivu sira sei fásil atu foti desizaun boot sira ne’ebé maka iha implikasaun ba moris sidadaun-nian loron-loron tanba situasaun emerjénsia ne’e la’ós hanesan situasaun baibain.

Notísia Relevante: Prezidente Repúblika Kontinua Apoia Ekipa Prevensaun Coronavirus

Jornalista : Cipriano Colo

Editór     : Cancio Ximenes

HAKEREK NO HATÁN

Please enter your comment!
Please enter your name here