Membru PNTL kontribui hamoos tahu iha Palasíu Prezidensiál. Imajen/Antonio Goncalves

DILI, 18 marsu 2020 (TATOLI)- Komandu Polísia Nasionál Timor-Leste (PNTL) realiza jogu voleiból amizade hodi selebra aniversáriu PNTL ba dala-XX.

Segundu Komandante PNTL Kamisáriu Mateus Fernandes. Imajen/Antonio Goncalves

Jogu ne’e abertura direita hosi Segundu Komandante Jerál PNTL Komisáriu Mateus Fernandes, akompaña hosi komandante sira inklui ekipa jogadór sira hosi parte unidade PNTL no grupu juventude iha kampu desportu, Sekretáriu Estadu Juventude Desportu (SEJD) Lecidere Dili, tersa  loro-kraik (17/03/2020)..

Komisáriu Polísia, Mateus Fernandes dehan, jogu ne’e bele hametin liután unidade no nasionalizmu PNTL hodi prepara-aan selebra aniversáriu PNTL ba dala-XX.

“Ita hotu hatene, PNTL ne’e mai hosi povu tanba ne’e atu selebra ninia aniversáriu ba dala-XX presiza kontribuisaun hosi povu,” hateten Komisáriu Mateus Fernandes liuhosi komunikadu imprensa ne’ebé ajénsia Tatoli asesu.

Nia afirma tan, polísia mai hosi povu, juventude no veteranu  tanba ne’e lori PNTL nia-naran agradese boot ba apoiu-sira ne’ebé oferese hosi liña ministériu no ema tomak.

Nia husu ba ekipa polísia sira ne’ebé partisipa iha jogu ne’e atu hametin liután sira nia konfiansa no dame hodi lori susesu ba Instituisaun PNTL.

“Ami espera katak, atividade ida ne’e la’ós katak atu halo buka ema sira ne’ebé joga di’ak, maibé ita buka atu oinsá konsolida ita nia fiar ba malu, ita nia domin ba malu nu’udar Timoroan atu depois iha futuru bele ajuda di’ak liután PNTL iha ninia servisu,” nia hatete.

Komisáriu Mateus hatutan, juventude  maka hanesan matadalan ba dezenvolvimentu tanba ne’e  presiza kontribui ba dezenvolvimentu PNTL no kontribui ba dezenvolvimentu iha setór hotu-hotu.

Jornalista : Eugénio Pereira

Editór       : Francisco Simões