Prezidente Parlamentu Nasionál, Arão Noe de Jesus da Costa Amaral. Imajen /Egas Cristóvão

DILI, 18 marsu 2020 (TATOLI)—Parlamentu Nasionál (PN), simu ona proposta alterasaun datolu kona-ba Lei Orsamentu no Jestaun Finanseira.

“Ha’u foin simu horisehik kona-ba proposta lei ba alterasaun datolu Jestaun Finanseira tanba horisehik no ohin toleránsia de pontu entaun aban mak ha’u halo prosesu,” dehan Prezidente Parlamentu Nasionál, Arão Noé de Jesus da Costa Amaral, ba jornalista sira iha resintu Eskola Filiál Nú Laran, Suku Grincenfor, Postu Administrativu Nain Feto, kuarta (18/3/2020).

Tuir nia, aban sei halo prosesu no baixa ba Komisaun C (Finansa Públika) hodi halo relatóriu no pareser hafoin aprezenta ba plenária hodi halo debate.

“Tanba proposta ne’e ho pedidu urjénsia, loron ida ba Komisaun C halo pareser depois plenária mak sei deside karáter urjénsia ka lae proposta de lei ne’e. Se plenária debate no aprova ne’e kontinua kedas ba jeneralidade, espesiál no finál global,” nia dehan.

Iha parte seluk, Prezidente Parlamentu Nasionál ne’e fó-sai katak, to’o ohin Governu seidauk aprezenta pedidu kona-ba levantamentu ba fundu petrolíferu hodi finánsia orsamentu duodésimu hahú hosi fulan-abríl bá-oin.

Proposta alterasaun ne’e, nia informa, aprezenta hosi Ministra Finansas Ein-Ezersísiu Sara Lobo Brites ba Konsellu-Ministru. Proposta alterasaun datoluk ne’e ba lei númeru 13/2019, 21 outubru kona-ba Lei Orsamentu no Jestaun Finanseira.

Ho proposta hosi Ministériu Finansas nian ne’e, Governu liuhosi desizaun koletiva Konsellu-Ministru (KM) aprova ona iha loron-kuarta, 1 1 marsu 2020 foin lalais ne’e.

Nofísia Relevante: PN Hein Konteúdu Proposta Alterasaun Lei Orsamentu no Jestaun Finanseira

Jornalista : Evarsito Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here