Prezidente Parlamentu Nasionál, Arão Noé de Jesus da Costa Amaral. Imajen Egas Cristovão

DILI, 18 marsu 2020 (TATOLI)—Parlamentu Nasionál (PN) seidauk simu proposta ida hosi Governu kona-ba pedidu levantamentu ba fundu petrolíferu.

“To’o ohin, ha’u seidauk simu pedidu kona-ba levantamentu. Tuir deklarasaun señora Ministra Finansa Ein-Ezersísiu hatete, ita sei iha saldu millaun $215. Ne’e katak osan fulan-abríl nian sei iha. Sóké ita-nia sistema katak osan kuandu tún ona ba millaun $200 Governu tenke halo pedidu levantamentu nune’e labele husik kofre mamuk,” dehan Prezidente Parlamentu Nasionál, Arão Noé de Jesus da Costa Amaral, ba jornalista sira, iha resintu Eskola Filiál Nú Laran, Suku Grincenfor, Postu Administrativu Nain Feto, kuarta ne’e.

Tanba ne’e, Parlamentu Nasionál (PN) hein Governu submete pedidu levantamentu fundu mina-rai tanba orsamentu duodésimu atu finánsia mákina estadu.

Arão Noé fiar katak bankada parlamentár sira sei fó importánsia tanba ida-ne’e liga ho vida nasaun nian.

Nia argumenta, bainhira Governu sente orsamentu duodésimu la-sufisiente, bele husu ho karáter urjénsia nune’e aprova lalais molok meadu marsu, nune’e Governu bele iha autorizasaun tanba hafoin parlamentu aprova sei aprezenta ba Prezidente Repúblika hodi halo promulgasaun.

Prezidente Parlamentu ne’e fó-sai, katak autorizasaun parlamentu nian tenke liuhosi asaun ida votasaun no aprovasaun iha plenária.

“Tuir lei dalan seluk labele (governu foti direta). Se di’ak liu ita kumpri regra ne’ebé iha tanba Lei Jestaun Finanseira no Lei Fundu Petrolíferu hatete só liuhosi Orsamentu Jerál Estadu ho autorizasaun parlamentu ninian,” nia argumenta.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here