Primeiru-Ministru, Taur Matan Ruak. Imajen Tatoli/ Egas Cristovão

DILI, 17 marsu 2020 (TATOLI)–Primeiru-Ministru (PM), Taur Matan Ruak, iha esperansa  Parlamentu Nasionál (PN) bele aprova proposta alterasaun datoluk Lei Orsamentu Jestaun Finanseira hodi fó fleksibilidade ba Governu atu rezolve kondisaun balun iha rejime duodésimu, tanba bainhira la aprova maka nasaun sei hetan difikuldade.

“Ha’u fiar metin katak Parlamentu sei aprova, se lae maka ita-nia nasaun sei hasoru difikuldade boot liután”, dehan PM Taur hafoin entrega simbolikamente ajudu umanitáriu ba komunidade afetadu dezastre naturál iha Suku Santa Cruz, tersa ne’e.

Notísia Relevante: Governu Aprova Proposta Alterasaun Lei Orsamentu no Jestaun Finanseira

Alterasaun Lei Orsamentu Jestaun Finanseira Permite Fleksibilidade ba Governu

Xefe Governu adianta, Governu laiha orsamentu no daudaun ne’e ezekutivu sira servisu ho orsamentu duodésimu, ne’ebé ho limitasaun no tenke uza ba kada fulan, tanba ne’e labele responde ba situasaun emerjénsia sira hanesan dezastre naturál no Coronavírus (COVID-19).

“Ohin Governu haruka ona Proposta Alterasaun datoluk Lei Orsamentu Jestaun Finanseira ba Parlamentu Nasionál. Ha’u husu ba bankada hotu atu halo aprovasaun hodi fó dalan ba Governu selu kompromisu rai-laran no rai-li’ur, tanba iha orsamentu doudesimál ne’e labele halo”, nia subliña.

Xefe Estadu refere liután, iha tersa aban (18/03) sei iha reuniaun estraordinária Konsellu Ministru no sei deside pedidu autorizasaun Parlamentu ba levantamentu orsamentu husi Fundu Petrolíferu, la’ós de’it atu haree problema dezastre naturál, maibé mós Governu nia kompromisu sira.

“Ita mós prepara-an ba Pandemia Coronavírus ne’ebé hanesan kestaun globál”, nia akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here