DILI, 18 marsu 2020 (TATOLI) – Diretór Timor Sugar Travel, Ariel Nainggolan, informa durante ezisténsia pendemia COVID-19, sira ninia ajénsia ne’ebé fa’an billete aviaun hetan rendimentu ladún di’ak, nune’e tanba situasaun sei kontinua nafatin maka ajénsia ne’e deside taka provizóriu atividade durante fulan-rua ba oin.
“Durante fulan-tolu to’o agora, ami ninia venda ba billete tun porsentu 90, tanba ema tauk atu halo viajen. Ho nune’e negósiu la’o ladún di’ak no provizóriamente ami haruka traballadór sira deskansa lai iha uma. Ami laiha rendimentu tanba ne’e deside taka provizóriu durante fulan-rua depende kondisaun Coronavírus ladún sirkula no movimentu la’o normál ona maka ami bele loke filafali”, dehan Dirijente ne’e ba Agência Tatoli iha ninia knaar fatin, Timor Plaza, kuarta ne’e.
Tuir Ariel Nainggolan, hafoin pandemia COVID-19 dezde janeiru to’o agora, rendimentu ajénsia kiik liu kompara ho antes ne’e.
“Loron ida dalaruma mamuk , fulan-ida dalaruma rendimentu kotor mós mamuk. Tanba ne’e ami deside sei taka Ajénsia Travel ne’e tanba laiha ona ema atu ba rai-li’ur ho situasaun sira hanesan ne’e, no bainhira ami loke nafatin maka ami laiha ona osan atu selu ami ninia traballadór sira, tanba ida-ne’e ami konsidera krize finanseiru ba ami ninia ajénsia”, nia akresenta.
Nia adianta, agora daudaun ho situasaun Coronavírus rasik defísil tebes ba ajénsia fa’an billete aviaun sira iha Dili. Tanba Governu Sentrál Indonézia halo ona desizaun ida katak sidadaun sira ne’ebé halo viajen ba Bali, Indonézia hanesan funsionáriu, sidadaun bain-bain to’o nível diplomata sira tenke foti viza autorizasaun iha Embaixada Indonézia iha Timor-Leste no bainhira to’o Bali tenke foti karta lisensa karantina maka foin liu bá Jakarta ka rai seluk, sé lae labele halo viajen ba Indonézia.
“Ami sente situasaun ida-ne’e ba oin defísil tebes, tanba ita fa’an mós hanesan de’it. Tuir ita haree aeroportu iha rai balun mós taka ona, sigifika ema sei la halo tan viajen”, nia salienta.
Entretantu, traballdór iha ajénsia viajen Timor Sugar Travel iha na’in-lima, kompostu husi timoroan na’in-haat no Indonézia na’in-ida.
Jornalista Natalino Costa
Editora: Julia Chatarina
