TIBAR, 18 marsu 2020 (TATOLI)–Ministériu Saúde hamutuk ho Organizasaun Mundiál Saúde (OMS), tersa ne’e, sensibiliza informasaun ba komunidade Suku Tibar, Postu Administrativu Bazartete Munisípiu Liquiçá kona-ba meiu prevensaun coronavirus ka COVID-19.

Diretora Prestasaun Saúde, Odete Viegas da Silva informa sensibilizasaun informasaun ne’e importante atu komunidade bele iha koñesimentu kle’an atu oinsá prevene sira-nia an hosi pandemia mundiál ne’e.

“Ami hakarak hato’o iha-ne’e katak asaun ne’e la’ós ministériu nia papél de’it maibé ne’e Governu nia hakarak ita hotu nia papél,” deklara Odete Viegas da Silva iha Tibar, tersa ne’e.

Moras ne’e fásil atu da’et bainhira ema ida ninia imunidade isin tun, tanba ne’e maka ema ida-idak tenke prevene an hosi moras coronavirus.

“Moras ne’e banhira kona ema haree ba idozu sira liuliu ba ema sira ne’ebé mak iha moras hanesan tensaun, korasaun, diabetes, entaun moras ne’e da’et lalais atu kona ema sira-ne’e tanba ita-nia sistema imunidade tun,” katak nia.

Tuir nia meiu prevensaun ida maka bainhira mear tenki taka ibun, fase liman beibeik ho sabaun, fani taka ho liman sikun no tenki iha espasu metru ida ho ema ne’ebé deskonfia suspeitu ba COVID-19 no mós tein hahán tenke tasak maka bele konsome.

MS hamutuk ho liña ministeriál no OMS sei halo mós sensibilizasaun informasaun hanesan ba komunidade iha fatin seluk iha territóriu Timor-Leste.

Iha oportunidade ne’e, nia parte mós aproveita hodi esplika ba komunidade no autoridade lokál iha Suku Tibar kona-ba desizaun Governu hodi harii fatin kuarentena iha Tibar.

“Ami hili fatin Tibar tanba dook husi komunidade no uma ne’e Governu la uza entaun ami hadi’a hodi uza ba kuarentena tanba ne’e mak laiha opsaun seluk ba Ministériu Saúde iha momentu ne’ebá. No fatin kuarentena ne’e uza provizóriu de’it la’ós uza ba tinan naruk,” nia esplika.

Sensibilizasaun informasaun ne’e partisipa husi relijiozu sira, Administradór Munisípiu Liquiçá, autoridade lokál sira inklui komunidade Tibar no PNTL.

Jornalista : Felicidade Ximenes

Editór      : Agapito dos Santos

HAKEREK NO HATÁN

Please enter your comment!
Please enter your name here