Ministru Obra Públika, Salvador Soares dos Reis Pires. Imajen Tatoli/António Gonçalves

DILI, 18 marsu 2020 (TATOLI) – Ministériu Obra Públika (MOP) planeia ona atu harii komisaun instaladora durante tranzisaun Eletricidade de Timor-Leste sai Empreza Públika (EDTL,EP), bazeia ba desizaun Governu liuhosi reuniaun Konsellu Ministru foin lalais ne’e, maibé ba inisiativa ida ne’e sei hein Dekretu-Lei transformasaun instituisaun estadu ne’e vigora.

Ministru Obra Públiku, Salvador Soares Dos Reis Pires, informa hafoin Prezidente Repúblika dekreta lejizlasaun transformasaun EDTL ba EP vigora maka sei hahú kria komisaun instaladora, nune’e bele kria regulamentu no transformasaun funsionáriu sira ba Empreza públika.

“Ita hein Dekretu-Lei ne’e dekreta ona no publika iha Jornál Repúblika maka sei ativa komisaun instaladora atu halo servisu”, tenik Ministru Salvador iha Palasiu Governu, kuarta ne’e.

Notísia Relevante: Governu Deside EDTL Sai Empreza Públika

Tuir governante ne’e, ekipa ne’e sei kompostu husi Komisaun Funsaun Públika (KFP), Gabinete MOP no Diresaun Jerál Administrasaun no Finansa MOP.

Objetivu harii komisaun ne’e hodi haree regulamentu balun husi EDTL no transformasaun funsionáriu sira hafoin muda estatutu, nune’e bele haree oinsá mak rekruta pesoál sira no halo transferénsia husi Funsionáriu Públika iha EDTL ba Empreza Públika, enkuantu daudaun ne’e  funsionáriu EDTL hamutuk iha na’in-500.

Efetivamente EDTL,EP Sei hahú iha 1 Janeiru 2021

Hafoin aprova Dekretu-Lei ne’e, Governu sei halo preparasaun durante tinan ida, hahú husi tinan ida ne’e hodi halo tranzisaun, tuir diploma  ne’ebé hetan aprovasaun no efetivamente sei hahú iha loron 1 janeiru 2021.

Ho nune’e, Ministru Salvador adianta komisaun ne’e sei halo levantamentu dadus no mós sosializasaun ba funsionáriu sira no haree opsaun saida maka sira hakarak hili, tanba ne’e sei servisu hamutuk ho KFP.

Nia dehan tan, Komisaun instaladora ninia servisu maka sei haree ba aspeitu hotu durante prosesu tranzisaun iha tinan ne’e hafoin implementa iha 2021.

Governu aprova ona estatutu EDTL sai hanesan Empreza Públika ho esperansa katak bainhira muda ona estatutu ne’e bele hamenus burokrasia no EDTL bele iha independénsia atu foti desizaun no halo atendimentu públiku ba avariasaun sira ho lalais no sustentável liútan.

Molok muda estatutu, EDTL hanesan diresaun jerál ida ne’ebé tutela ba MOP, nune’e atendimentu EDTL nian tuir burokrasia iha ministériu sira, tanba ne’e bainhira muda ona ba Empreza Públika maka instituisaun ne’e iha ona autonomia fiananseira hodi halo atendimentu ho efetivu liután.

Molok ne’e, Sosiedade Sivíl Iha Timor Leste mós deklara apoia polítika transformasaun EDTL ba Empreza Públiku hodi independentemente halo servisu hodi fó naroman ba konsumidor sira.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here