Membru PNTL hamoos hela tahu no foer sira ne'ebé nokonu iha estrada laran depois inundasaun, sesta (13/03/2020). Imajen/Antonio Goncalves

DILI, 18 marsu 2020 (TATOLI) – Komandu Polísia Nasionál Timor-Leste (PNTL) koloka ona nia membru hosi unidade hotu hamutuk na’in 1.200 tun ba ajuda populasaun kapitál Dili ne’ebé sofre inundasaun.

Notísia Relevante : Jenerál Lere Mobiliza Forsa 500-resin Hamoos Fo’er iha Dili

Komandante Jerál PNTL, Komisáriu Faustino da Costa, dehan, atividade limpeza ne’ebé envolve membru PNTL hahú kedas iha sábadu  too agora hodi konsentra ba ajuda povu ne’ebé sofre inundasaun inklui hamoos repartisaun  estadu nian hanesan, Palásiu Prezidensiál, Palásiu Governu no eskola-sira ne’ebé hetan estragus.

 “Ami nafatin mobiliza forsa PNTL hamutuk na’in 1.200 tun ba iha terrenu hodi hamoos komunidade afetadu sira nia uma,” hateten Komisáriu Faustino da Costa ba jornalista, ohin, hafoin organiza nia membru sira halo limpeza iha área Bidau Masaur, Becusse no fatin seluk-tan.

Programa limpeza ne’e akompaña hosi autoridade lokál inklui komunidade. Polísia sei hapara atividade ne’e bainhira populasaun afetadu nia uma moos hotu ona.

Bombeiru Kontinua Fase Estrada

Iha parte seluk, Diretór Jerál Protesaun Sivíl, Ismail Babo dehan, korpu  Bombeiru kontinua rega no fase estrada sira ne’ebé nakonu ho tahu hodi halakon rai-rahun.

Korpu Bombeiru mós kontinua koopera ho Diresaun Nasionál Saneamentu Dili tula nafatin bee moos fahe ba komunidade sira ne’ebé afetadu iha area  Taibesi, Becora no Bidau nian.

Ismail Babo dehan, sira nia parte mós agradese durante limpeza Kompañia NCBA, Monte Veado, Sali Magu, Montana Di’ak, Jonize, Nananiu no kompañia nasionál ho internasionál balun oferese karreta hodi ajuda tula fo’er.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here