Primeiru-Ministru, Taur Matan Ruak, Prezide Reuniaun Konsellu Ministru iha Palásiu Governu. Kuarta (19/02/2020). Imajen/TATOLI Egas Cristovao.

DILI, 18 marsu 2020 (TATOLI)–Governu liuhosi reuniaun Konsellu Ministru, kuarta ne’e, aprova ona rezolusaun ida hodi bandu sidadaun estranjeiru hosi nasaun afetadu Coronavirus ka COVID-19 hodi tama iha Timor-Leste liuhosi Aeroportu, Portu no Fronteira Terrestre durante fulan ida.

Ministru Reforma Lejizlativa no Asuntu Parlamentár (MRLAP), Fidelis Manuel Leite Magalhães, informa rezolusaun ne’e sei válidu durante fulan ida depois maka Governu sei halo revizaun foun bazeia ba nesesidade ne’ebé iha ho intensaun atu halo prevensaun ba infesaun COVID-19 iha Timor-Leste.

“Rezolusaun ne’e hodi hatuur pontu sira tuir mai ne’e, ohin Konsellu Ministru aprova atu bandu ema sira iha semana haat ba kotuk vizita tiha ona iha nasaun sira ne’ebé kona ona COVID-19, ema sira-ne’e sei la permite atu tama iha Timor – Leste,” dehan Fidelis ba jornalista iha Praça de Proclamação da Independéncia, Palásiu Governu, kuarta ne’e.

Nia esplika sei la bandu timoroan ka estranjeiru ne’ebé  antes ne’e hela iha territóriu Timor-Leste maski daudaun ne’e sira hala’o hela viajen ba nasaun afetadu Coronavirus.

“Iha kazu ne’ebé mak fundamentu duni ne’ebé iha relasaun ho defeza no interese nasionál bele autoriza ema estranjeiru bele tama mai ita nia nasaun, maibé ida ne’e presiza autorizasaun hosi Primeiru-Ministru, ne’e atu dehan saida! COVID-19 kona ita! Ita sei presiza tulun hosi nasaun seluk balu dalaruma sei mai mós hosi nasaun sira ne’ebé rejistu ona kazu, maibé ita presiza nafatin loke dalan ba sira atu tama mai iha Timor – Leste,” katak Fidelis.

Maibé la taka dalan ba transporte marítima no aero atu tama Timor-Leste hodi importa sasán nesesidade bázika no seluk tan.

“Kargu ba ai-han medikamentu la’o normál soké iha protokolu foun, katak ró sira kuandu mai tenke para iha zona internasionál ne’ebé rezerva hela iha portu Dili para atu evita sidadaun estranjeiru ne’ebé iha ró laran atu halo teste, sasán bele mai maibé ema sira-ne’e labele tun mai rai-maran nune’e bandu mós ita-nia traballadór sira atu sa’e ba ró laran,” dehan ministru.

Rezolusaun ne’e mós bandu funsionáriu Estadu nian no sidadaun baibain atu halo viajen ba rai-li’ur.

KM mós deside atu prepara kuarentena voluntária ba sidadaun ne’ebé maka foin fila hosi estranjeiru hodi izola-an durante loron 14.

“Ema sira foin mai hosi rai-li’ur karik agora tenke izola lai iha kuarentena durante loron 14 nia laran foin bele sai. Se funsionáriu Estadu nian mak foin maihosi rai-li’ur entaun sei labele ba servisu durante loron 14,” nia haktuir tan.

Jornalista : Hortencio Sanchez

Editór       : Agapito dos Santos

1 KOMENTÁRIU

HAKEREK NO HATÁN

Please enter your comment!
Please enter your name here