Ministra Finansa ein ezersísiu, Sara Lobo Brites. Imajen Tatoli/Egas Cristovão

DILI, 18 marsu 2020 (TATOLI)–Governu liuhosi reuniaun Konsellu Ministru (KM) aprova Proposta Lei  ne’ebé aprezenta hosi Ministra Finansa ein ezersísiu, Sara Lobo Brites, kona-ba autoriza realizasaun transferénsia estraordinária husi Fundu Petrolíferu (FP) ho montante millaun $250 hodi finansia mákina Estadu.

Orsamentu ne’e atu utiliza durante vijénsia rejime duodesimál, ho forma atu garante kondisaun finanseira ba funsionamentu Administrasaun Públika to’o fulan-outubru, bainhira aprezentasaun Orsamentu Jerál Estadu (OJE) foun.

“Konsellu Ministru aprova proposta ida hosi Ministra Finansa interina, kona-ba autorizasaun ba realizasaun transferénsia estraordinária hosi Fundu Petrolíferu hatuun mai ba kofre Estadu atubele finansia rejime doudesimál tanba osan ne’ebé maka iha la to’o”, hateten Ministru Reforma Lejizlativa no Asuntu Parlamentár, Fidelis Manuel Leite Magalhães, hafoin reuniaun ezekutivu iha Praça de Proclamação da Independéncia, Palásiu Governu, kuarta ne’e.

Notísia Relevante: Governu Sei Halo Levantamentu Millaun $250 Husi FP Sustenta Mákina Estadu

Governante ne’e adianta, daudaun ne’e osan iha kofre Estadu la to’o tanba kada fulan Governu gasta millaun $50, tanba ne’e maka Ministériu Finansa (MF) iha devér atu husu levantamentu hodi reforsa kofre Estadu.

“Konforme lei hateten, konfre Estadu labele menus hosi millaun $200. Tanba ne’e maka Ministra Finansa husu Governu atu aprova pedidu hodi reforsa kofre Estadu. Nune’e hafoin Governu haree, tuirmai sei hato’o filafali ba Parlamentu”, dehan Ministru Koordenadór Asuntu Ekonómiku interinu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here