Inundasaun iha área Ponte Maufelo, Dili, iha loron 13 marsu hafoin udan boot. Imajen Tatoli/António Gonçalves

DILI, 17 marsu 2020 (TATOLI)–Vítima afetada ba lalubur, José da Conceição hateten, lalubur ne’e halo bee tama iha nia uma estraga hotu sasán inklui roupa eskola nian, dokumentu serbisu no dokumentu eskola nian mak labele salva maibé to’o agora nia seidauk hetan apoiu hosi Governu.

“Bee tama uma laran ne’e nia nalihun sa’e to’o metru ida hodi rezulta ami-nia uma dodook no sasán at hotu. Maibé to’o agora ami seidauk hetan apoiu husi Governu,” dehan José da Conceição  ba Ajensia TATOLI iha nia hela fatin, iha Aldeia Karrega Tiru, Suku La’o-Rai, Postu Administrativu Nain Feto, Munisípiu Dili, tersa (17/3/2020).

Nia haktuir, udan boot no mota tún ne’e bee la la’o tuir mota no bee sa’e fali ba ponte leten nomós nakfahe ba rua. Tanba,nia dehan, ai-boboot mak satan netik tiha ponte mota nian, nune’e bee tenke tama komunidade nia uma-laran hodi estraga hotu sasán no dodok hotu.

“Ami-nia sasan la salva hotu inklui roupa eskola nian, dokumentu serbisu no dokumentu eskola no mós foos dodook hotu. Ami labele halo buat ida tanba bee tama uma boot tebes. Portaun sai kleuk hotu. Uluk udan boot maibé bee la sa’e hanesan hori bainhira sesta ne’e,” nia dehan.

Nia hatutan, Ministériu Obras Públika (MOP) liuhosi Institutu Jestaun Ekipamentu (IGE-sigla portuges) lori ekipamentu pezadu mai hodi suru sai tiha hotu rai no taho dodok mak agora rai haree ba di’ak uitoan ona.

“Ba ami komunidade nia uma ne’e, la hatene, IGE bele ajuda hamoos ka la’e. Maibé daudaun ne’e ami ida-idak hamoos hela ami-nia uma tanba susar ita atu deskansa no tein loro-loron nian. Poir liutan mak ho labarik sira tanba ita tauk sira moras,”  nia dehan.

Nia dehan, agora ne’e mak haree labarik sira ne’e di’ak hotu maibé ba oin keta afeta ba moras ruma karik ne’ebé mak kauza husi inundasaun boot ne’ebé mak akontese. Tanba to’o agora parte saúde mós seidauk mai halo tratamentu ba labarik sira-nia saúde.

“Ami sente triste tanba to’o agora pesoal saúde no Governu seidauk mai ami-nia fatin hodi haree ami-nia kondisaun hela fatin nian no mós ami seidauk hetan apoiu ruma hosi estadu maski lakon sasán barak no dodok hotu,” nia afirma.

Vítima sira kontinua esforsu hamoos sira-nia fatin ne’ebé mak taho nakonu tiha uma no halo sasan dodok hotu maibé nia dehan taho sira-ne’e seidauk bele hamoos tanba dodook liu ne’e hein loron-manas kona tiha depois mak suru ba fakar.

Tuir observasaun ajénsia TATOLI iha fatin akontesementu nian iha vítima sira-nia fatin hatudu katak liuhusu tahu-teen ne’ebé seidauk hamoos ne’e bele hamosu moras no ISPA bainhira tahu-teen nakfilak ba rai-uut. Komunidade sira ida-idak hamoos sira-nia uma no balun fase sasán bokon.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here