Ministru Turizmu, Komérsiu no Industria interinu no atuál Ministru Reforma Lejizlativa no Asuntu Parlamentár, Fidelis Manuel Leite Magalhães. Imajen Tatoli/ Egas Cristovão

DILI 18 marsu 2020 (TATOLI) – Governu liuhosi Ministériu Turizmu, Komérsiu, no Industria (MTKI) husu ba komunidade bainhira hetan negosiante ne’ebé hasa’e folin tuir hakarak, tenke hato’o keixa ba autoridade kompetente.

“Kona-ba folin sasán sa’e, Autoridade Inspesaun Fiskalizasaun Atividade Ekonómika Sanitária, Institutu Públiku (AIFAESA,IP) simu ona informasaun, halo hela akompañamentu no sira fahe mós sira ninia númeru kontaktu. Sira deklara katak sira prontu kualkér momentu hodi halo intervensaun bainhira iha keixa ruma”, tenik Ministru Turizmu, Komérsiu no Industria interinu, Fidelis Manuel Leite Magalhães iha Palásiu Governu, iha kuarta ne’e.

Maibé governante husu ba públiku atu hato’o keixa ne’ebé kredível, ezemplu hanesan iha aumentu husi folin bain-bain $10 hasa’e ba $20 to’o 30, konsidera hanesan folin espekulasaun maibé hasa’e husi folin $10 ba $10,50, konsidera normál tanba situasaun mundiál ne’ebé pániku liga ho pandemia COVID-19.

Tuir atuál Ministru Reforma Lejizlativa no Asuntu Parlamentár ne’e, folin sasán ho situasaun ne’e tenke iha mudansa tanba merkadu mundiál mós atualmente iha mudansa.

“Ita tenke foku maka ba folin ne’ebé sa’e ho forma ne’ebé hanesan abuzu estremu, sira seluk AIFAESA tun identifika nune’e aplika tuir lei. Tanba ne’e maka komunidade sira atu halo keixa karik tenke halo keixa ne’ebé konfirmadu didi’ak molok hato’o keixa”, nia akresenta.

Ministru Fidelis adianta, tanba rekursu iha Timor-Leste la sufisiente, maka sei uza rekursu ne’ebé iha.

“Labele hato’o keixa halimar tanba sei difikulta servisu instituisaun hanesan AIFAESA”, nia subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here