Primeiru-Ministru, Taur Matan Ruak, Prezide Reuniaun Konsellu Ministru Iha Palásiu Governu, Kuarta (18/03). Imajen/Egas Cristovão

DILI, 18 marsu 2020 (TATOLI)Governu liuhosi reuniaun Konsellu Ministru (KM) iha kuarta ne’e, aprova proposta ne’ebé maka aprezenta husi Ministru obra Públika, Salvador Soares dos Reis Pires, kona-ba medida emerjénsia ba rekonstrusaun sasán estragu kauza husi inundasaun ne’ebé akontese iha sesta (13/03).

“Konsellu Ministru formaliza ona ofisialmente grupu task force, lidera husi Diretór Jéral Obra Públika, ne’ebé mak koordena kona-ba resposta ba inundasaun no hahú ba prosedimentu nesesáriu sira”, hateten Ministru Reforma Lejizlativa no Asuntu Parlamentá, Fidelis Manuel Leite Magalhães iha Palásiu Governu, hafoin reuniaun ezekutivu.

Governante ne’e adianta, ba kontratasaun empreza privada sira, sei ajusta ho diretu ne’ebé iha hela kontratasaun, devidamente formalizada ona no justifika tuir termu no efeitu husi ekipa task force.

Notisia Relevante: Governu Sei Kria Ekipa Task Force Halo Estimasaun Kustu ba Dezastre Naturál

Biban ne’e, KM mós aprova proposta deliberasaun kriasaun ba Grupu Tékniku Traballu no aprovasaun medida estraordinária ba reabilitasaun zona afetada sira husi inundasaun iha semana liubá iha parte leste no sentru.

Proposta ne’e aprezenta hosi Ministériu obra Públika (MOP) hamutuk ho Ministériu Planeamentu, Investimentu no Estratejiku (MPIE), inklui konsellu Administrasaun husi Fundu Infraestrutura (KAFI).

“Inundasaun afeta ba ponte barak iha sidade Dili nia-laran no kauza husi dezastre naturál ne’e maka sasán materiál sira no família barak maka tenke ba hela iha fatin seluk”, nia akresenta.

Nia refere liután, biban ne’e, aprezenta mós dadus estragu sira no nesesidade intervensaun ho objetivu atu estabelese filafali mobilidade víaria no kontinua atu fornese enerjia elétrika ho seguransa, inklui garante reparasaun sistema abastesimentu ba bee-moos no importante liu hotu mak atu hala’o servisu urjente ba limpeza drenajen.

Aleinde ne’e, KM mós aprova adjudikasaun direta ba servisu iha situasaun ne’ebé krítika tebes no disponibiliza verba ida hodi bele halo faze ba despeza esensiál sira, nune’e bele realiza kontratasaun ne’ebé presiza ba nesesidade loron-loron iha Dili, inklui fó seguransa ba sidadaun sira hotu iha fatin ne’ebé sira hela.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here