Funsionariu husi Parlamentu Nasional halao hela linpeza iha eskola Filial Nu Laran.Imajen/ Evaristo Martins

DILI, 18 marsu 2020 (TATOLI)—Eskola Filiál Nú Laran hosi sentru Ensinu Báziku Bidau ne’ebe lokaliza ha Suku Gricenfor (Grilhos Central Formosa), Postu Administrativu Nain Feto, to’o ohin loron seidauk hala’o prosesu aprendijazen tanba tahu dodok sei nakonu iha resintu eskola refere.

“Eskola Filiál Nú-Laran mós hetan inundasaun. Sala no resintu eskola nian nakonu ho taho. Maibé iha segunda-tersa, ami hetan apoia hosi Ministériu Edukasaun hodi hamoos tiha sala hotu durante loron rua. Ohin, ami hetan apoia hosi Parlamentu Nasionál ne’ebé ajuda hamoos resintu eskola ne’ebé nakonu ho taho. Se ohin taho iha resintu eskola ne’e suru sai hotu, aban ami bele eskola fila-fal,i” dehan Koordenadór Eskola Filiár Nú Laran, Rogério Alegria Pinto, ba jornalista sira iha eskola refere, kuarta ne’e.

Nia dehan, até agora prosesu aprendijazen seidauk la’o tanba sala sira fo’er hotu no resintu eskola mós taho-nurak nakonu.
“Ami espera katak depois hamoos tiha sala aula sira, estudante sira bele fila-fali ba ensinu aprendijazen. Se ohin hotu, aban ami bele hahú fila-fali prosesu aprendizajen,” nia hateten.

Tuir nia, alunu iha eskola Filiál ne’e na’in-584 ne’ebé la ba hotu eskola no profesór hamutuk na’in-19.

“Ami hei katak depois normaliza tiha situasaun ne’e eskola bele hahú fila-fali. Eskola ne’e la dún hetan estragus maibé bee mak nakonu iha sala laran no livru sira ami konsege tau iha fatin as,” nia dehan.

Ho tahu dodo ne’ebé nakonu, Prezidente Parlamentu Nasionál, Arão Noé de Jesus da Costa Amaral, organiza funsionáriu parlamentu nian inklui bankada parlamentár sira hala’o atividade limpeza iha eskola refere.

Tuir observasaun Agência TATOLI, iha eskola taho ne’ebé impaktu lalubur (inundasaun) iha sesta-feira liubá nakonu iha resintu eskola nian no sala aula sira fo’er hotu. Ho kondisaun eskola ne’ebé sei nakonu ho taho-dodok halo estudante sira labele halo movimentu iha eskola refere.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here