Kondisaun komunidade sira ninia uma, ne’ebé hela besik mota-ninin Bidau hetan estragu hafoin udan-boot no provoka inundasaun sesta lorokraik (13/03). Imajen Tatoli/António Gonçalves

DILI, 18 marsu 2020 (TATOLI) – Ekipa Task Force ne’ebé lidera husi Ministériu Planeamentu no Investimentu Estratéjiku (MPIE) no Ministériu Obra Públiku (MOP), hahú aprezenta ona kustu estimasaun millaun $15 ba Konsellu Ministru (KM) hodi hadi’a estragu husi inundasaun, hafoin udan forte iha sesta (13/03).

“Ekipa Task Force aprezenta Kálkulu kustu estimativu hamutuk millaun $15, karik sei iha aumentu no menus oituan tanba lista balun ohin hatama ona no membru Governu balun sei hatama tan”, tenik Ministru Salvador iha Palásiu Governu, kuarta ne’e.

Governante ne’e adianta, ekipa Task Force aprezenta ona ba KM, maibé husu atu kontinua halo levantamentu hodi aprofunda kustu estimasaun ne’e hafoin aprova hodi bele fó dalan ba kompañia sira atu hahú servisu.

“Aban no bain-rua bele halo ona kustu estimasaun globál. Ida-ne’e kuandu deside bele tama ona kontratu ho kompañia sira atu ita halo ona rekooperasaun no normalizasaun ba sasán estragu sira,” nia akresenta.

Tuir Ministru Salvador, ekipa Task Force ne’e, estabelesidu bazeia ba despaisu husi Primeiru Ministru, Taur Matan Ruak, husi rezultadu enkontru entre Konsellu Administrasaun Fundu Infraestrutura (KAFI), iha tersa ne’e ho Instituisaun Estadu relevante.

Tuir nia, kustu estimasaun orsamentu ne’ebé halo retensaun no hadi’a estragu sira hanesan iha área obra públika nian, hanesan torre transmisaun no transformadór eletrisidade sira besik mota ne’ebé atu a’at ona, hadi’a kanalizasaun bee-moos iha área Maloa, Becusse, Ponte My Friend no eskola tolu ne’ebé afetadu inundasaun.

Nia refere liután, kona-ba prosesu aprovasaun orsamentu sei haree ba montante, tanba bainhira montante ne’e millaun $5 ba leten tenke hetan aprovasaun husi KM, maibé montante ne’e millaun $1 KAFI mak deside no millaun $1 ba kraik liña ministeriál sira maka deside.

Ministru Salvador subliña, ekipa Task Force fó ona prioridade  atu hadi’a mota tolu hanesan My Friend, Becusse, no Mota Hera, ekuantu retasaun ba barreira sira, estrada no hadi’a eskola 5 de Maiu, Sergio Veira de Melo, rekooperasaun no rekonstrusaun ba uma vítima sira no seluk tan.

“Ba kompanñia sira ne’ebé sei partisipa iha projetu emerjénsia ne’e depende ba tékniku sira ninia haree ba kapasidade rekursu”, nia salienta.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here