Sekretária Estadu Igualdade no Inklusaun, Maria Jose da Fonseca Monteiro de Jesus. Imajen/ Egas Cristovão

DILI, 17 marsu 2020 (TATOLI)-Sekretária Estadu Igualdade no Inkluzaun (SEII), Maria José de Jesus hateten,  Governu aloka Dotasaun Orsamentu Temporária (DOT) ba SEII kada fulan hamutuk rihun $172.023,82.

“Orsamentu duodesimu ba SEII Kada fulan-fulan ami hetan rihun 172.023,82. Osan hirak ne’e ami uza ba saláriu vensimentu, transferénsia públiku no bens serbisu,” dehan Maria José de Jesus ba jornalista TATOLI iha nia serbisu fatin, Obrigado Barak, Dili, tersa (17/3/2020).

Nia hatutan, osan ba bens serbisu nian SEII aloka ba programa sira ne’ebé liga ho igualidade jéneru no mós ba programa Trainer of Trainer (ToT) nian ba pontu vokál no ekipa grupu sira iha Dili hafoin sira ba munisípiu hodi fahe tutan informasaun ne’ebé hetan iha formasaun.

“Ita implementa ita-nia programa iha kapitál Dili tanba atu halo redusaun ba osan ka minimiza osan,”  nia dehan.

Aleinde ida ne’e, departamentu hakbiit feto hodi hasa’e ekonómia feto nian ne’ebé hala’o atividade balun relasiona ho ekonómia ne’ebé hahú ona iha fulan marsu ne’e iha munisípiu sira.

Nia informa, sira iha osan duodésimu ba transferénsia públiku nian maibé sira la brani blok tanba bazeia ba komisaun F ne’ebé trata asuntu saúde, seguransa sosiál no igualidade jéneru iha parlamentu nasionál nia rekomendasaun, katak tenke hasai hotu tiha montante hirak ne’ebé aloka ba transferénsia públiku.

“Tanba ne’e osan transferénsia públiku nian hamutuk rihun $41 resin ba SEII, ami la uza,” nia dehan.

Tuir nia, SEII sei la halo atividade ne’ebé mak relasiona ho fundu transferénsia públiku no sei laiha atividade foun ne’ebé SEII hala’o bainhira sei uza Dotasaun Orsamentu Temporária (DOT).

Osan ba saláriu vensimentu, nia informa, menus hosi rihun $100, bens serbisu mak rihun $172 no transferénsia públiku mak rihun $41 resin maibé osan ba transferénsia públiku SEII la uza.

Nia dehan, osan duodésimu iha nia implikasaun boot ba SEII tanba siatema loke de’it iha tempu badak hanesan halo proposta, entaun SEII kontinua de’it serbisu ne’ebé mak hala’o ona iha anteriór.

 Jornalista : Osória Marques

Editór       : Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here