Ministru Obra Públika, Salvador Eugênio Soares dos Reis Pires. Imajen Tatoli/Egas Cristovão

DILI, 18 marsu 2020 (TATOLI) – Ministériu Obra Públika (MOP) aprezenta ona Dekretu-Lei tolu hanesan lei jestaun territoriál, klasifikasaun uzu solu no urbanizasaun inklui edifikasaun ba Konsellu Ministru hodi distribui ba kada ministrériu atu fó kometáriu, hafoin aprova iha nível ezekutivu sira atu halo planeamentu urbana Timor-Leste ninian.

“Ezbosu lei tolu kona-ba planu urbanu ami fahe ona ba konsellu Ministru atu sirkula ba liña ministeriál hodi hetan feed back molok halo aprovasaun”,  tenik Ministru Obra Públika, Salvador Soares Dos Reis Pires ba Agência Tatoli iha Palasiu Governu, kuarta ne’e.

Ho nune’e, Ministru Salvador iha esperansa atu hala’o koordenasaun ho liña ministériál liuliu Ministériu Reforma Lejizlativa no Asuntu Parlamentár (MRLAP) atu haree artigu balun labele kontradiz ho lei ne’ebé iha ona.

“Ita espera koordenasaun ho MRLAP atu analiza artigu sira kuandu la soke malu ho lei sira seluk enkuantu iha pareser pozitivu bele halo ona diskusaun no aprovasaun iha Konsellu Ministru,” nia akresenta.

Notísia relevante: MOP Sei Kria Tan Dekretu Lei Tolu Atu Halo Planeamentu Urbana

Salvador informa, molok ne’e iha ona lei ne’e aprova ona iha VI Governu Konstitusionál liuhosi Ministériu Planeamentu no Investimentu Estratéjiku (MPIE).

“Kuandu lei tolu ne’e aprova, ita bele halo planeamentu urbanu nomós regulamentu kiikoan sira hodi kontrola ema hela dook iha estrada oinsá no ita bele organiza sidade. Entaun ida ne’e mak ita tenke iha uluk”, nia adianta.

Governante refere liután, kona-ba espesífiku baze instrumentu sira ne’e, baze legál bele estabele hodi sustenta asaun planeamentu urbanu no mós regula kreximentu ambiente fíziku ne’ebé sidadaun sira instala iha sidade.

Kona-ba jestaun movimentu transporte no tráfiku, tuir ministru ne’e kabe ba kapasidade Ministériu Transporte no Komunikasaun (MTK), maibé ho vizaun presiza melloramentu rede estrada no ponte atu fasilita movimentu.

Entretantu, rezultadu progresu servisu MOP iha tinan-2019 iha área Abitasaun no Planeamentu Urbanu maka hanesan programa atu harii uma ho unidade 4.000 iha sidade Díli, Estudu Pre-viabilidade no identifikasaun sítiu kompletu ona no tama faze negosiasaun ho parséiru internasionál hanesan International Finance Corporation (IFC) no parséiru dezenvolvimentu sira atu dezenvolve estudu no dezeñu ho modalidade PPP (Parséiru Públiku Privadu).

MOP hahú Estabelese enkuadramentu legál sira no planeamentu urbanu ba sidade Díli no munisípiu hodi promove lei tolu hanesan planeamentu territoriál, Edifikasaun Urbanu, no Kualifikasaun no klasifikasaun uzu de solu.

Ministériu ne’e mós estabelese ona akordu ho parseiru dezenvolvimento hanesan United Nation (UN) Habitat hodi apoiu harií planeamentu territoriál ba Dili no prosedimentu kontrolu dezenvolvimentu físiku no lansa ona konkursu ba estudu revitalizasaun Aitarak-Laran no polu dezenvolvimentu ba Batugade no munisípiu Baucau.

Aleinde ne’e, MOP mós hala’o ona revizaun kustu unitáriu ba konstrusaun Eskola Vokasionál Politékniku no Akademia Peska iha Betano, Manatuto no Lautém no Estudu Planu Mestre ba Horpital Nacional Guido Valadares (HNGV), Lahane no sidade Universidade iha munisípiu Aileu.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here