Vitima dezantre natuarais, Jacinta Cacilda, Imajen/Ozoria Marques

DILI, 17 marsu 2020 (TATOLI)–Horiseik, Crus Vermelha Timor-Leste (CVTL-sigla portugés) observa ona kondisaun no situasaun vitíma sira-nian iha área afetada ba lalubur iha Aldeia Au-Hun, Suku Becora.

Ekipa hosi Crus Vermelha Timor-Leste ne’e mós vizita vítima Cacilda Freitas nia uma hodi haree kondisaun atuál ne’ebé mak afeta ba komunidade sira iha momentu lalubur boot mosu.

Tuir vítima katak, CVTL mai observa no foti dadus vítima sira-nia uma maibé hein de’it bainhira mak sira fó rezultadu hosi dadus ne’ebé mak sira kobre ona.

“Horiseik, Crus Vermelha mak mai haree ona ha’u-nia uma no sasán sira ne’ebé mak dodook. Maibé, parte Governu seidauk mai haree no seidauk fó apoiu emerjénsia,” nia hatete ba jornalista TATOLI iha Suku Becora, Postu Administrativu Cristo Rei, Munisípiu Dili, tersa (17/3/2020).

Maske Governu seidauk mai vizita, nia dehan, inundasaun ne’e natureza tanba ne’e ema hotu-hotu tenke pasiénsia no hamoos ida-idak nia fatin maibé Governu karik sira hanoin fó apoiu sira prontu simu no agradese.

“Natureza nia serbisu mak sai nune’e tanba ne’e ba ami uma ida ne’e laiha problema. Bainhira Governu la mai haree kondisaun ne’e, imoportante hamoos ita-nia uma basta moos ona para ita bele uza. Se ita hein hotu Governu, ita toba iha ne’ebé no han iha ne’ebé. Karik, Governu fó apoiu ruma ami prontu simu no agradese tanba bele ajuda,” nia dehan.

Nia hateten, ninia uma ne’e bele hamoos ona maibé dalan públiku ne’ebé movimentu transporte públiku nian ba-mai mak bele hamosu moras infesaun vias respiratória ba komunidade sira iha ne’eba tanba tahu-teen sira ne’e bainhira karreta no motor sama sai fali rai-rahun.

“Ami tauk mak rai-rahun ne’ebé mak karreta no motor sama ba mai iha leten mak lori fali moras ISPA mai ami karik tanba mai-nia uma besik loos estrada ninin,” nia informa.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here